Beaufort ullut 14-it iluanni immap asseqalissaaq

USA-p Canada-llu umiarsuaataasa nunarsuatta avannarpasinnersaata imartaata naqqa assiortoraat, sapaatip akunnerata uuma aallartilaarnerani ilanngutassiaraarput.

Maannalu paasinarsivoq nunat taakku marluk assortuunnerisa kingorna, umiarsuit immap naqqanik assiliortuisut paasiniarlugu imartaq Beaufort-ip nalaa Alaskap Yukon-illu akornanniittoq kikkunnit pigineqarsinnaanersoq.

Amerikamiut Canadamiullu umiarsuaataat marluk suleqatigiillutik, Beaufort-ip imartaata naqqa assiliortorpaat, tamannalu aallartippoq ukiut pingasut matuma siornaliornali, tassalu sapaatit akunneri marlussuit qaangiuppata imartap assiliortorneqarnera naammassippat assortuutaalissaaq.

Beaufort-ip imartaa Alaskap avannamut sineriaanut aammalu Canadami naalagaaffiup Yukon-ip sineriaanut atavoq.

Imartaq 21.000-it kvadrat kilometerisut isorartutigisoq kikkunnit pigineqarnersoq suli assortuussutaavoq. Canadamiut isumaqarput namminneq pigalugu, tassami Yukon-ip Alaska-llu killeqarfiat imaannarmut atammat, amerikamiulli isumaqarput killeqarfik sinerissamut qanittuusoq avannamullu sangujartorluni, tamannalu tunngaviglaugu amerikamiut isumaqarput namminneq imartaq pigilugu.

Killeqarfiup sumiinnera nunanut taakkununnga paasissallugu pingaaruteqarpoq, uuliamik gassimillu qalluinissat eqqarsaatigiinnarnagit aammali Beaufort-ip imartaa aalisagaqarluarmat.

Beaufort-ip imartaa manna tikillugu ukiup annerpaartaani sikumik qallersimaneqartarpoq, maannali sikup annikilliartornera paasinarsimmat uuliamik gassimillu misiliilluni qillerinissat ajornannginnerulersussaassapput.

USA-p pilersaarutigaa imartami uuliamik qillerisussanut neqerooruteqarniarlutik tamannali Canadamiunit akerlerineqarpoq.

Beaufort-ip imartaa ukiorpassuarni akerleriissutaasimavoq, maannali nunat taakku marluk neriupput imartap assiliortoreerneqarnerata kingorna isumaqatigiikkumaarlutik killeqarfik sumut killeqarnersoq.