BankNordik nunatsinni aningaasarsiornerulersoq
Ukioq 2017 aningaaseriveqarnikkut angusarissaarfiuvoq. Grønlandsbankenip 2017-imi angusaqarluarluni sapaatit akunnerata siuliani nalunaaruteqarneratulli BankNordikip pitsaasumik angusaqarluni ullumi aamma nalunaarutigaa.
- Niuerfivut tamarmik ajunngitsumik takutitsipput, Kalaallit Nunaannilu immikkoortortaqarfitsinni naatsorsuutit inernerat 26 millionit koruuniuvoq, taamaalillunilu 2016-imi piffissamut tamatumunnga naleqqiullugu 4 millionit koruuninik siuariaateqarfiulluni. Taarsigassarsisitsineq qaffariaateqalaarsimasoq takusinnaavarput, BankNordikimi pisortaaneq Árni Ellefsen tusagassiorfinnut nalunaarummi taama oqarpoq.
- Kalaallit Nunaanni ineriartornissamut periarfissarpassuit eqqumaffigaagut, niuernikkullu siuariartorumalluta iliuusissamik pilersaarusiorpugut, pisortaaneq oqarpoq.
AAMMA ATUARUK Grønlandsbankenimut ukioq iluanaarfiulluartoq
Taassuma aamma erseqqissaatigaa inuiaqatigiit kalaallit pitsaasumik ineriartornissaat aningaaseriviup peqataaffigerukkaa. Tamannalu ilaatigut BankNordikip ilinniagaqartunut legatimik siorna pilersitaanik agguaassisarnikkut pivoq.
- Legatip ulloq manna tikillugu ilinniartunit kalaallinit maluginiarneqarnera soqutigineqarneralu assorsuaq nuannaarutigaarput, Árni Ellefsen oqarpoq.
Banknordik Danmarkimi, Savalimmiuni Nunatsinnilu aningaaseriveqarnikkut suliaqartoq Savalimmiunilu aamma sillimmasiisarfimmik pigisaqartoq Aningaasaqarnermik nakkutilliisoqarfimmit niuerfinni assigiinngitsuni ingerlataminut, qarasaasiaqarnikkut isumannaallisaanerminut illuutinillu pigisaminik nalikilliliinerminut tunngatillugu siorna decembarip qaammataani arlalinnik peqqussuteqarfigineqarpoq.
