Banknordik ikililerivoq

Savalimmiormiut aningaaseriviutaat Banknordik Danmarkimi nunatsinnilu immikkoortortaqarfeqartoq 2011-imut isertitaanut naatsorsuutigisamit ikinnerusussanngorput, tassami ilanngaatissat akileraarutillu ilanngaatereerlugit 15-niit 25 millioner koruuninik sinneqartuussamaarmata, uffa siusinnerusukkut 50-iniit 80 millioner koruuninik sinneqartoornissaq naatsorsuutigineqarsimagaluartoq.
Allattoq Knud Reimer
februaarip 07-at 2012 07:44

Savalimmiuni silarlussimanera sinneqartoorutit ikinnerunerinut pissutaavoq, aningaaseriviummi Savalimmiuni sillimmasiisarfiutaa silarlussuarmik eqquinerlussimavoq sinneqartoorutissanillu apparsaasuusimalluni.

- Savalimmiut silarluffiusimaqaaq, sualummik siorna novembarip 24-iani decembarillu 25-iani silarluttarnerit kingunerlutsitsisimaqaat. Suliffeqarfissuullu immikkoortortaqarfia sillimmasiisarfik Trygdimit aningaasartuutissat 20-25 millioner koruuninik amerleriarnerinik kinguneqarsimalluni, Banknordik taama nalunaaruteqarpoq.

Aningaaseriviup aningaasanik 90-100 millioner koruuninik siorna attartortitsisimavoq, tassalu ilimageriikkat 50 - 100 millioner koruunit iluaniillutik.

Aningaaseriviup matunikup Amagerbankip amigartoortuteqarani ingerlatai  Banknordikip siorna pisiarai, 2010-milu aningaaserivik nunatsinniittoq Sparbank Vest pisiarimmassuk nunatsinni aamma immikkoortoqarfeqalersimallutik.

Banknordikip Ilulissani Sisimiunilu immikkoortortaqarfii maajip aallaqqaataani matusussanngorneri januaarimi tamanut nalunaarutigaat.

Ilulissani Sisimiunilu immikkoortortaqarfinnik matusilernermut atatillugu taakkunani atuisut amerlanerit qarasaasiakkut aningaaserivik netbank kiisalu akiliutinik atuinerulersimanerat matusinissamut peqqutaatinneqarput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq