Bankimi pisortaq aaqqissuusseqqinnissamik kaammattuuteqartoq
Nunatta karsia naatsorsuutigisamit isertitaqarnerujussuuvoq. Tamannalu nuannaarutissaalluartoq, Grønlandsbankenip pisortaa isumaqarpoq.
Pissutsilli allanngunngillat siunissarlu ungasinnerusoq eqqarsaatigalugu suli unammilligassaqarpoq. Taamaammat politikerit ingerlalluarallarneq aaqqissuusseqqinnissamut atussagaat, Martin Kviesgaardip neriuutigaa.
- Maanna killiffiup pitsaasuunera politikerit Inatsisartullu pikkorissut pisortat aaqqissugaanerannik aaqqissuusseqqinnissamut soorunami aallartitsiffigissavaat, Martin Kviesgaard oqarpoq.
Taannalu Naalakkersuisut sunik siunnersuuteqarumaarnerannik takussalluni qilanaarpoq, sinneqartooruteqarneq isumalluutigineqaannarsinnaanngimmat.
- Piffinnut pissakisaarfinnut utaqqinissaq navianarsinaavoq, taanna oqarpoq.
iluarsaaqqinnissanik aallartitsinissaq utaqqissukkaanni ajornakusuulersinnaavoq, innuttaasunut misinnartussat sakkortunerulissammata.
- Taavali pisariaqarnera taamanikkussami paasiuminarnerulissaaq, Kviesgaard oqarpoq.
Tassalu nunatta karsia sinneqartooruteqaraluartoq, aaqqissuusseqqittoqartariaqartoq pisortaq oqarpoq.
Sinneqartoorutimmi aaqqissuusseqqinnernit inernerunatik akinit pitsaasunit isertinneqarput.
- Siunissaq ungasinnerusoq eqqarsaatigalugu attanneqarsinnaasumik ineriartortitsisinnaassagutta, taava aaqqissuussaanikkut aaqqissuusseqqittariaqarpugut, Martin Kviesgaard oqarpoq.
Sinneqartoorutillu siunissami aningaasarsiutaasinnaasunut aningaasaliissutaanissaat silatusaarnerussasoq, bankimi pisortaq isumaqarpoq.
- Attaveqaqatigiinnermut atortorissaarutinut ilinniarnermulluunniit atorneqarsinnaapput. Nunatsinni isertitaqarnissamut tunngaviusinnaasunik qulakkeerinnissinnaasunut atorneqassappata isumatusaarnerussaaq, pisortaq oqarpoq.
Kviesgaardip 2016-ip immikkut ittumik aningaasarsiorluarfiunissaanik siulittuuteqartup aalisakkanut akit allanngorannginnissaat ilimagigamiuk, 2017-ip 2018-illu aningaasarsiorfiunerulaarnissaat naatsorsuutigaa.
Bankimili pisortap maanna sinneqartooruteqarneq nuannaarutigaa.
- Pingaartumik aningaasarsiorluarneruneq sinneqartooruteqalertitsimmat. Tamannalu pitsaasuuvoq, Martin Kviesgaard oqarpoq.