Nipilersoqatigiinnik paarlaasseqatigiittarniartut
Suleqatigiit pingasut - Islandip Nuummi generalkonsulatia, Air Iceland aamma Katuaq - ukiunut pingasunut atuuttussamik kulturikkut suliniuteqarluni suleqatigiinnissamik ippassaq sisamanngornermi isumaqatigiissuteqarput. Suliniut taaguuteqarpoq "bandswap", kalaallisuunngorlugu nipilersoqatigiinnik paarlaasseqatigiinnermik taaneqarsinnaasoq.
Nipilersoqatigiit Nuummeersut Reykjavikimeersullu paarlaattassapput, illoqarfinni taakkunani marlunni tusarnaartitsisassallutik.
Takornariaqarnerup annertusarnissaa aammalu Nunatta Islandillu kulturikkut attaveqarnerisa nukittorsarnissaa siunertaasoq, tusagassiorfinnut nalunaarummi allaaserineqarpoq.
Nipilersoqatigiinnik paarlaasseqatigiinnerat siulleq ukiormanna novembarip 14-iani pissaaq.
Islandimiut ilaarsillutik rockimik nipilersortartut Dúndurfréttir Nuummi Katuami tusarnaartitsissapput Nunatsinneersullu nipilersoqatigiit Nanook Reykjavikimi Gamle Biomi tusarnaartitsissallutik.
