B-67 ukioq manna pissartanngorpoq

Arsaattartoqatigiit Nuummeersut ilaat ukioq manna pissartanngornissaat qularutigineqanngilaq, tassami B-67 IT-79-ilu finalimut ukioq manna anngummata.

IT-79 oqaluttuarisaanermi pissartanngorniutivinnissamut siullerpaamik annguppoq. B-67-ili 3-1-imik ajugaavoq, taamalu ukiut sisamassaat, katillugillu aqqanilissaat Nunatsinni pissartanngorlutik.

Unammisut nikinneranni suli isertitsisoqanngilaq, unamminerulli immikkoortuata aappaani B-67 1-0-imik siuarpoq, IT-79-illi strafferluni isertitsineratigut unammisut 1-1-imik naligiileraluarluarlutik.

B-67 taava minutsit 76-issaanni 2-1-imik siuarpoq, unamminerullu naammassiliivinnerani isertitseqqillutik, taamalu 3-1-imik ajugaallutik pissartanngoqqillutik.

Pissartanngorniutivittoqannginneranili bronzinnanniuttoqarpoq, G-44-lu Qeqertarsuarmeersoq normu 3-tut inissippoq, taamalu bronzinnalluni. G-44 pissartanngorniunnermik aaqqissuisunut Kugsak-45-mut matumani 4-0-imik ajugaallualaavippoq.

Kugsak-45 pissartanngorniunnerit aallarnerlugit gruppini unammisaqattaarnerni ingerlalluaraluarpoq, siornali normu 2-nngortut bronzinnanniunnermi unammigamikkit tassa 4-0-imik ajorsarput.