B-67-ip pissartanngorniunnermi anisitsinerit naammagittaalliutigigai

Siullermik John Ludvig Broberg unammineq 54 minutsinik ingerlareersoq anisitaavoq.

Unamminerup immikkoortuata aappaata naammassiartornerani taassuma ilia, Aiko Nielsen anisitaavoq. Tassunga mianersoqqussuteqareerpoq, dommerillu Aiko Nielsen uppisinneqartuusaarluni uukapaatitsiniarsarisorigamiuk aappalaartulerpaa.

Tamannalu B-67-ip siulittaasuata, Jimmy Holm Jensenip kamaatigaa. Taannalu dommerit peqatigiiffiannut maanna naammagittaalliuteqarpoq. Aiko Nielsenimi uppisinneqartoq B-67-ip aalajangiusimavaa, arsaattartumilu anisitaanera Jimmy Holm Jensenip ilorrisimaarutiginngilaa.

Arsaattartut marluk anisitaasimanngikkaluarpata pissartanngorniutivinneq allarluinnarmik inerneqarsimassagaluartoq Jimmy Holm Jensen isumaqarpoq.

- Dommerip ajugaaniutivinnermi nuannersumi taama sunniuteqartiginera annernarpoq, Jimmy Holm Jensen oqarpoq.

Isertitseriaqattaarnerit

B-67 Nagdlúnguamut Ilulissaneersumut unamminermi siuarsimagaluarpoq.

Unamminerup nalinginnaasup aatsaat naammassingajalernerani naligiilerput. Unamminerlu 2-2-mik inerneqarmat, pissartanngorniutivinneq isertitseriaqattaarnermik naammassineqarpoq. Tassanilu Nagdlúnguak 5-6-imik ajugaavoq.

AAMMA ATUARUK Straffeqattaareernermi Nagdlúnguak pissartanngortoq

B-67 Kalaallit Arsaattartut Kattuffiannut KAK-mut maanna naammagittaalliuteqarpoq, KAK-lli naammagittaalliuut itigartitsissutigaa.

- Pisut ataasiakkaat dommerip siggarfigisimasai KAK-miit oqaaseqarfiginiarnagit aalajangerpunga, KAK-p siulittaasua, Benjamin Kielsen oqarpoq.

B-67 kingusinaarluni naammagittaalliuteqartoq

B-67-ip siulersuisa piffissaatillugu naammagittaalliuteqannginnerat Kielsenip naammagittaalliuteqarnermut itigartitsissuteqarneq tunngavilerpaa.

- Taamaatorli B-67-ip naammagittaalliutaanut itigartitsissuterput uppernarsarniarpara, Benjamin Kielsen oqarpoq.

B-67-ip unammeqqinnissaq kissaatiginngilaa, dommerinilli qinaasilluartalernissaq kissaatighiinnarlugu. Immaqa aamma dommerimik inuusoqisumik misilittagaqarnerusumik peqassaaq, siulittaasoq, Jimmy Holm Jensen KNR-imut oqarpoq.

KAK-lli dommerinik toqqaasartuunani nassuiaatigaa, tamannalu Dommerit peqatigiiffiata akisussaaffigigaa oqaatigalugu.

Dommerit peqatigiiffiat KNR-imut oqaaseqarumanngilaq.