B-52-ip Pituffiup eqqaani nakkartup paasissutissartai isertuunneqarput

Folketingip Kalaallit Nunaat pillugu ataatsimiititaliaata tullianik ataatsimiinnissaani Lars-Emil Johansen danskit naalakkersuisuinut kajumissaaruteqarniarpoq, paasissutissat tamakkiisut USA-mit saqqummmiunneqarnissaannik piumasaqaammik. Pappilissanik maannamut saqqummiunneqarsimasunit, allannerit ilaat qernertumik titarlugit asserneqarsimapput, ilai quppernerit ilivitsut atuarneqarsinnaajunnaarlugit asserneqarsimallutik, Lars-Emil Johansen oqarpoq.

Lars-Emil Johansenip folketingimi Kalaallit Nunaat pillugu ataatsimiititaliaq tullianik ataatsimiilerpat saqqummiunniarpaa, qallunaat naalakkersuisui kajumissaarneqassasut, paasissutissat tamakkiisut USA-mi oqartussaasunit saqqummiunneqassasut.

Timmisartorsuup B-52-ip nakkarneranut pissutaasut sorpiaanersut saqqummiunneqarnissaat piumasarineqassalluni.

Amerikamiut sakkutuuisa timmisartorsuata B-52-p januaarip qaammataani 1968-imi Pituffiup eqqaani sikumut nakkarnerata kingorna, piniartut avanersuarmiut arfineq pingasut, Thulemilu sakkutooqarfimmi sulisartut, sikumi nakkarfiusumi apummik aammalu timmisartup aseqquinik katersuipput. Apummik timmisartullu aseqquinik katersinerup kingorna inunnut taakkununnga sunniutigisinnaasaasa Amerikamiunit missiuiffigineqarsimanerisa isertuunneqarnerat, Lars-Emil Johansenimit ilimagineqarpoq.

Qaanaami innuttaasut peqqissusiannik missuinissaq ukiup matuma ingerlanerani pisussatut aalajangiunneqareerpoq. Kalaallit Nunaanni peqqissutsimut naalakkersuisoqarfik aammalu Danskit peqqissutsimut ministereqarfiat misissuinermik ingerlatsisussaapput.

Danskit peqqissutsimut ministeriata Jakob Axel Nielsenip misissuitsinissamut akuersinissaa aamma utaqqineqarpoq.