B 52-ip nakkarfiata eqqaani uumasut napparsimapput
Amerikamiut sakkutuuisa timmisartorsuata B-52-ip 1968-imi Pituffiup eqqaani nakkarnerata kingorna uummasut piniarneqartartut radiup qinngorneranik ulorianartumik akoqalersimanissaat piniartunit ilimagineqarpoq.
Ilimatsaassineq aallaavigalugu misissuisarfimmik pilersitsisoqassanersoq pillugu, Folketingimut ilaasortaq Lars-Emil Johansen danskit peqqissutsimut ministeriannut Berthel Harderimut apeqquteqarpoq.
Uumasut Pituffiup eqqaani piniartunit pisarineqartartut ilaat, soorlu puisit iloqutai marninissimasarput, aallaat qimminut nerliutigineqartaraluarlutik qimminnit neriumaneqarneq ajorlutik, Uusaqqak Qujaukitsoq oqarpoq.
Puisit meqqoqanngitsut piniartunit aamma pisarineqartarput.
Uumasut piniartunit pisarineqartut ajoquteqartut misissuiffissaannik ilisimatuunit misissuiffiusussamik imaluunniit uumasunut ajoquteqartunut tigooraavissamik, Qaanaami pilersitsisoqarsinnaanersoq, Folketingimut ilaasortap Lars-Emil Johansenip apeqqutigaa.
Lars-Emil Johansenip danskit peqqussutsimut ministeriannut Berthel Harder-imut apeqquteqaateqarnera isumalluarnarnersoq Uusaqqak Qujaukitsumut apeqqutigigatsigu taanna aappaatigut isumalluarnerarpoq.
- Utaqqisinnaajunnaarpoq misissuiffimmik pilersitsinissaq piaartumik pinissaa piumasaraa. Akisussaasut kikkuunerisa assortuussutigineqarnerat uniffiusinnaanngilaq, piaartumik misissuivimmik pilersitsisoqarnissaa piumasaraara, missorneqarneranni namminneq piniartut malinnaasinnaaniassammata, Uusaqqak Qujaukitsoq oqarpoq.
