Timersorneq

AWG2016: Kajumissutsiminnik suliaqartut kajumissutsiminnik suliaqartut allat ikiuleraat

Nunat issittormiut Nuummi aappaagu marsimi unammiuaalerpata kajumissutsiminnik sulisut kaffisorfigalugulu neriffigisinnaasaannik Arctic Winter Games 2002-misulli ittumik pilersitsisoqassaaq, Rotary Nuuk Arctic Winter Games 2016-imi peqataasut katersuuffigisinnaasassaannik isumaginnissalluni.

Allattoq Karsten Sommer

decembarip 15-at 2015 09:53

Nutserisoq Mads Lynge

Naak Arctic Winter Games 2002-mut naleqqiullugu marloriaatingajammik annertuseriaateqaraluartut Rotaryp tunuarsimaarfiginngilaa, peqataasullu katersuuffigisinnaasassaannik tassa isumaginneqqissalluni:

- AWG 2016-imi kajumissutsiminnik suleqataasunut katersuuffioqqinnissani Nuuk Rotary Clubip qilanaarisorujussuuaa. Nalunngilarput kajumissutsiminnik suleqataasut annertuumik suliaqartussaasut, sulisullu kaallutik sulinnginnissaat qulakkeerniarlugu pitsaanerpaamik sulissaagut. AWG 2016-imut akuunissatsinnut qilanaartorujussuuvugut, Rotary Nuuk taama allaaserisaqarpoq.

Aamma atuaruk Australiamiut AWG 2016 nalilersussavaat

Kajumissutsiminnillu sulisut sulinerat nuannaartitsillutillu nersorneqartarput, Arctic Winter Games 2016-imillu aaqqissuisut tamanna aamma nuannaarutigaat:

- Uagutsinnut pingaaruteqartorujussuuvoq suliassaq angisooq tamanna Rotaryp suliariumammagu. Kajumissutsiminnik suleqataasut unammiuaarnerni pinngitsoorsinnaanngilluinnarparput, aammalu Rotaryp tapersersuineratigut kajumissutsiminnik suleqataasunut nuannersumik katersuuffeqartitsisoqarsinnaavoq, taakku sulinissartik sioqqullugu imaluunniit sulereernerminni kaffisoriartorfigalugulu tamusseriartorfigisinnaasaannik. Iliuuseq kusarnarluinnarpoq, Arctic Winter Games taama allaaserisaqarpoq.

Katersuuttarfik Nuup Katersortarfianiissaaq, aappaagulu marsip ulluisa tallimaannit aqqaneq-aappaat ilanngullugu ammassalluni.

Aamma atuaruk AWG-mut ullut 100-t