AWG-mut ullut 100-jut
- Tikittussarpassuit timmisartortinnissaannut pilersaarusiorluta aallartereerpugut, timersortussat siniffissaat katiterlugit unammeqataasussallu nerisarfissaanni Qassimi inuppassuit nerisillugit misilittarlugu. Unamminerit aallartinnissaannut sungiusartorujussuuvugut pilersaarusiortorujussuullutalu, Arctic Winter Games 2016-imi pisortaq Maliina Abelsen oqarpoq.
Aaqqissuisunulli suli unammillernartoqarpoq. Nuummi timersortarfissuaq Inussivik illup iluani unamminernut atorneqassaaq. Taassumalli qalia ukiuni arlaqartuni ussiippoq, Arctic Winter Gamesilli aallartinnginnerani iluarsineqareernissaa naatsorsuutigineqarluni.
Aamma atuaruk Nuuk AWG 2016-imut piareersartoq
Suliassallu ilai allanit suliarineqartariaqartut, Maliina Abelsenip nassuerutigigaluarlugu neriulluarniarpoq.
- Taanna iluarsineqarnissaa qularutiginngilluinnarparput. Iluarsineqartariaqarpoq, tassami unamminerit aallartinnissaannut ullut 100-juunnanngorput, Arctic Winter Gamesilu kinguartinneqarsinnaanani. Taamaammat piareerneqarsimasariaqarpoq. Soorunami inuiaqatigiinni ikiorneqarnissarput atorfissaqartilluinnarparput, ikiuiniarlunili tamaviaartoqartoq misigivarput, Maliina Abelsen oqarpoq.
Aamma atuaruk Nuummiut: Arctic Winter Games sapaatiuppat ikiorsiuk
Imermit aputiliuutit
Unamminerit aappaagu aallartippata aputeqartussaanersoq qularnaveeqquserneqarsinnaanngilaq. Apullu amigaataassappat imermit aputiliuutit atorlugit aputiliortoqassasoq, Maliina Abelsen nassuiaavoq.
Aningaasalli atorsinnaasaat amerlanngimmata apilluarnissaa neriuutigineqarpoq.
- Missingersuutitsinni aningaasat atorsinnaasagut ikittuararsuupput. Apilluarnissaali ilimagaara. Taamaassanngippalli sisorarfissaasinnaasuni sisorarfiliorniarsarisariaqassaagut. Apummik amigaateqarluta siornatigut misilereerparput, taamaattoqassappallu iluatsitseqqissinnaanerput qularnanngilaq, Maliina Abelsen oqarpoq.
Aamma atuaruk AWG 2016: Ammaanersiornermik misiliineq
Kajumissutsiminnik sulisut
Tamatuma saniatigut kajumissutsiminnik suliniartunik 1200-ngajannik ilannguttoqarsimasoq, Arctic Winter Gamesip nittartagaani atuarneqarsinnaavoq.
Kajumissutsiminnilli sulerusuttut 200-jut missaat suli amigaatigigitsik Maliina Abelsen oqarpoq, pillagaasimannginnermilli uppernarsaammik aamma meeqqanik pinerliisimannginnissamut uppernarsaammik takutitsisoqartariaqartoq erseqqissarlugu.
