AWG-p ataatsimiititaliarsuanut ilaasortat Nuummut tikeraartut
Nunani issittuneersut nuimasut AWG 2016-imut piareersaatinut malinnaajartortut Nuummut ippassaq tikipput.
Tikeraallu tassaapput Arctic Winter Gamesip ataatsimiititaliarsuani ilaasortat aammalu ukiup tulliani nunanit allanit nunallu immikkoortuinit peqataasussatut aallartitat 30-t missaanniittut. Kommuneqarfik Sermersooq tusagassiorfinnut nalunaaruteqarluni taama allappoq.
AAMMA ATUARUK AWG nuannannissamut pilikannissamullu qaaqqusivoq
Tikeraarneq aallartitanit ataasiakkaanit akisussaasunit Nuup takunissaanut AWG 2016-illu ukioq ataaseq qaangiuppat pitinnagu aaqqissuussisut naapinnissaannut periarfissaqarpoq, tamannali kisimi periarfissaanngilaq, aamma AWG 2016-ip killiffianik ingerlariaqqinnissamillu paarlaasseqatigiinnissamut periarfissaqarpoq.
- Piareersaativut uagut nammineq aaqqissuussisuusutut iluarisimaaqaavut, aaqqissuussisuusugullu tamatta ullut nuannersuunissaat qilanaaralutigit, ilaatigut pilersaarutaasut tikeraartunut issittumilu ikinngutitsinnut saqqummiunneqarumaarlutik, Asii Chemnitz Narup taama oqarpoq.
AWG 2016-imi peqataasussat tassaapput: Kalaallit Nunaat, Alaska, Alberta, Northwest Territories, Nunavut, Nunavik, Yukon, Yamal Sibiriami qeqertaq, kiisalu Saamit aallartitaat.
