VIDEO ASSILLU: AWG-mi ujammit siulliit qulakkeerneqartut

AWG-mi unammisartut Fort Smithimi silagissiorput, KNR-imiillu snowboardertarfik Fort Smithip ungataani Riverdale Parkimiittoq ataasinngornermi ualikkut alakkaratsigu seqinnarippoq nillerpiaranilu, aamma isiginnaariat minnerunngitsumillu unammisartut qiimalluarput.

Kalaallit snowboardertartut pingasut, Jonathan Rosing, Inuk Brøns Appelt aamma Ajaana Rosing Kleemann, Northwest Territoriesimeersunik, Yukonimeersunik Alberta Northimeersunilu unammisaqaramik sisoqattaarnerminni ingerlalluarput.

Ajaana sølvinnappoq Inullu bronzennalluni

13-inik ukiulik Ajaana Rosing Kleemann Rail Jamimi sølvinnappoq katillugit 548 pointeqarluni. 13-inik ukiulik Ella Kuhn Alberta Northimeersoq kuultinnappoq katillugit 613-inik pointeqarluni, bronzennattuuvorlu Yukonimeersoq 12-inik ukiulik Riley Boland, taanna katillugit 478-inik pointinnalluni.

Nukappiaqqat Rail Jamimi unammineranni 13-inik ukiulik Linden Rakestraw Alberta Northimeersoq katillugit 817-inik pointeqarluni kuultinnappoq, sølvinnattuuvoq aamma Alberta Northimeersoq 11-inik ukiulik Becker Olson, taanna katillugit 868 pointeaarluni, bronzennattuuvorlu nunatsinneersoq 14-inik ukiulik Inuk Brøns Appelt, katillugit  878-inik pointeqarluni.

Nunatsinneersoq 13-inik ukiulik Jonathan Rosing, kusanarluinnartumik aamma normu 4-nngorpoq, katillugit 832-nik pointeqarluni.