Aviisi: Trumpip Georgiami ministeri taaguussinernik nassaartinniarsarisimavaa
USA-p præsidentiata, Donald Trumpip, præsidentimut novembarip ulluisa pingajuanni qinersinermi ajorsarnini mumisinniarlugu nalaagaaffimmi Georgiami naalagaaffimmut tunngasunut ministeri kimigiiserfigalugu taaguussinernik nassaartinniarsarisimavaa.
Aviisi Washington Post, oqarasuaatikkut akunnermik ataatsimik sivisussusilimmik oqaloqatigiinnermit immiussamik pissarsisimasoq, taama allappoq. Oqarasuaatikkut arfininngormat oqaloqatigiissimasut aviisi allappoq.
Aviisi naapertorlugu, Trump parteeqatiminut Georgiamilu naalagaaffimmut tunnagusuni ministerimut Brad Raffenspergerimut ajunngisaarluni, qinnuteqarluni sioorasaarillunilu qinersinerup inerneranik allanngoqqusivoq.
- Georgiami inuit kamapput, nuna tamakkerlugu inuit kamapput, Trump immiussami Washington Postimit pissarsiarineqarsimasumi oqartoq tusaaneqarsinnaavoq.
- Taavalu naatsorsueqqissimallutit oqassaguit ajortoqarnavianngilaq, præsidenti oqarpoq.
AAMMA ATUARUK USA-p senatiani republikanerit amerlanerussuteqartut siuttuata Bidenip ajugaanera nalunaarutigigaa
Raffenspergerilli præsidenti oqaloqatigiinnermi itigarteqattaarpaa, demokraatilu Joe Biden naapertuilluartumik eqqortumillu ajugaasoq nassuiaatigisarlugu.
- Præsidenti ilinnut unammillernartoq tassaavoq nalunaarsuutivit eqqunnginnerat, Raffensperger akivoq.
Biden præsidentimut Georgiami qinersisut 49,5 procentiinit taaguunneqarpoq, Trumpilu 49,3 procentinit taaguunneqarluni. Biden Trumpimit 11.779-init taaguunneqarnerusoq arlaleriarluni kisitseqqittoqqareersoq inerniliinerup takutippaa.
