Folketingimut qinersineq 2015 Aviisi: Danmarkimi amerlanerussuteqartut Atlantikup avannaamiut qinersinermut sunniuteqarnissaat kissaatiginngilaat
Qinersinerup qanoq inerneqarnissaanut Atlantikup Avannaamiut ilaasortaatitaasa sunniuteqarnissaat qallunaat amerlanerussuteqartut kissaatiginngilaat.
Gallupip Berlingske sullillugu qallunaanik qinersisartunik 1050-inik isumasiuinerata nutaap tamanna paasinarsisippaa.
Sisamanngorpat Folketingimut qinersinissami Atlantikup Avannaanit ilaasortanngortut aalajangiisooriaannaasut, qineqqusaarneq tamaat tusartuarparput, tamannali qallunaat nuannarinngilaat.
Aamma atuaruk Qinigassanngortittut Folketingimut ilisimasaat killeqartut
Nunatta aamma Savalimmiut Folketingimi naalakkersuinikkut sunniuteqarnissaat qallunaat kissaatigaat - amerlanerussuteqartulli isumaqarlutik kina ministeriuninngussanersoq sunniuteqarfigisariaqanngikkaat.
Gallupip Berlingske sullillugu isumasiuinerata tamanna ersersikkaa, Politiko.dk-mi allaaserineqarpoq.
Talerperliit maannakkorpiaq siuarsimalaarput, sapaatilli akunnerata siuliani saamerliit siuarsimalaaraluarlutik. Pissutsillu taamaatillugit Nunatsinniit Savalimmiuniillu ilaasortanngortut sunniuteqarnissaat qallunaat kissaatiginngilaat.
Naalagaaffeqatigiinni suleqatigiinnerup ingerlaqqinnissaa, akissuteqartut 70 procentiisa akuersaarpaat.
Aamma atuaruk Politikerit Skaalemut: Folketingi pisariaqarpoq
Danmark ataatsimoortunik tapiissutinik suli tapiisassasoq, 58 procentit isumaqarput.
Atlantikup avannaamiut Folketingimi sisamanik ilaasortaatitaqarnissaat 53 procentit isumaqatigigaat, Politiko.dk-mi allaaserineqarpoq.
51 procentilli isumaqarput, Atlantikup avannaamiut qinersinerup inerneranut aalajangiisuunissaat pissusissamisuunngitsoq. 54 procentit isumaqatigiissutigaat, avannaanit ilaasortanngortut ministeriuninngortussamik aalajangeeqataasinnaasariaqanngitsut.
Talerperlernut saamerlernullu agguataaraanni, saamerlernit 39 procentit talerperlerniillu 70 procentit tamatumunnga isumaqataapput.