Aviisinik naqiterlaanik naqiterisitseqqittarneq iluatsilluartoq
-Maani Nuummi aviisiliorneq eqqartoratsigu aalajangerlugulu printerit anginaarlugit pisivugut. TELE POST-imilu Danmarkimut naqitertitsisarnivut takorloorlugit nunatsinni nammineq naqiterisalerusussimavugut, aallartippoq.
Suliffeqarfiup aamma tusartaannarpaa nunanut allanut printerisitsisarneq annertulaartoq, taamaammat Nuummi printerissussusinnaaneq aamma takorluulersimavaat.
- Suugaluartulluunniit: Quppersagaaqqat, brochurit, katalogit, piseqqusaarutit, quppernerit ataasiakkaat flyer-inik taasartakkat tamalaallu sanasinnaavagut, Salik Hard oqarpoq.
POST Erhverv akuttunngitsumik suliffeqarfinnit saaffigineqartarpoq assersuutigalugu ukiup affaanut naatsorsuutinik saqqummiiniarnerminnut atatillugu printerissuteqqusunik.
- Nunatta Naqiteriviusimasoq Naqitat naqitassatigut ilaanni angummassinnaasanngimmat Danmarkimi naqiterisitsisoqartariaqartarpoq, tamannalu timmisartukkut assartukkat tikinnissaannik utaqqinermik - allaammi CO2-mik mingutsitsinermik kinguneqartarpoq, oqarpoq.
Imaanngilarligooq namminneq ingerlatseqatigiiffitsik Namminersorlutik Oqartussanit pigineqartoq privatinut unammillertuussasoq. - Naqiterissussissagutta piffissaqarnersugut apeqqutaalluinnassaaq . TELE-p POST-illu nammineq saqqummersitassai aviisinillu printerisarnivut salliutissavavut, Salik Hard erseqqissaavoq.
- Piariikannerpugut maannakkut misileraavugut, tassa piffissami qaninnermi avammut neqerooutigilissavarput, sapaatip akunnerini qaninnerni.
Salik Hardip ilanngullugu ilisimatitsissutigaa, printerit marluk pisiarineri, katiterteri, pikkorissarfiginerilu katillugit 2,5 millioni koruuninik akeqarsimasut. Aningaasartuutit taakku ukioq ataatsip imaluunniit ukiut marluk ingerlanerini matussuserneqarsinnaasut takorloorpaat.