Aviisi.gl-ip uparuarneqarnera ileqimisaartuutigaa
Aviisi.gl-imi allaaserinninnermi uppernarsaateqanngitsumik saqqummersitsisarneq, tusagassiorfiit tutsuiginartumik suleriaaseqarnerannut naapertuutinngitsoq, Tusagassiornermik Institutimi pisortaq Naja Paulsen ippassaq oqarpoq.
- Uparuaanera eqqunngilaq, tusagassiortormi uppernarsaatinik peqaraluarluni saqqummiisariaqanngilaq, inatsisileritooq Aviisi.gl-imik pilersitsisoq Lars Bo Bjørknæs oqarpoq.
- Allakkat allallu uppernarsaatissat pigaakka. Soorunami aamma kissaatigineqarpat taakku nittartakkamut ilanngullugit takusassiarisinnaagaluarpakka. Maannakkumulli pisariaqarsorisimanngilara, kukkugumali nittartakkami aamma takuneqarsinnaalernissaat teknikkikkut aaqqiinnariaavoq, oqarpoq.
Tusagassiornermik Institutimi pisortap Naja Paulsenip radioavisikkut Lars Bo Bjørknæs ippassaq uparuarpaa, oqarluni neriorsuutini eqquutsinngikkai. Bjørknæsimi oqarsimavoq paasisat 400-t itisilerillunilu paasiniaanerit toqqortaatigalugit, nittartagarlu Aviisi.gl aqqutigalugu saqqummiutissamaarlugit. Takussutissat tamakku Naja Paulsenip suli amigaataanerarpai.
Assersuutigaa Atassutip siulittaasuata Gerhardt Petersenip imigassartorsimatilluni biilersimaneranik Aviisi.gl-imi takussutissaqarneraaneq, uppernarsaatissaqanngitsoq. Oqarpoq tusagassiortutut sulinermi ileqqorissaarnissaq pingaarluinnarmat uppernarsaateqartariaqartoq.
- Tusagassiuutini allani, soorlu KNR-imi AG-milu allaaserinneriaaseq maliinnarpara. Soorlu KNR-ip Jens Napãtûmut tunngatillugu 2005-imi allaaserisai aamma AG-p politikerit nuimasut aningaasanik atornerluinerannik aasaq allaaserisai assersuutissaapput. Uppernarsaatitaqarpianngillat, ikinnerpaammi uppernarsaatitalinnik saqqummiisarput. Uanga allaaseriniakkakka allaaseritinnagit kalerreqqaartarpakka, pineqartullu naammagittaalliorneq ajorput, Bjørknæs oqarpoq.
Aviisi.gl-imi kalaallisut allaaserinnittoqarsimannginnera ippigalugu, allaaserisat qallunaatuuinnaanerat, Tusagassiornermik Institutimi pisortap aamma apeqquserpaa.
- Allaaserisakka qallunaatuinnaq maannamut saqqummiuttarpakka, paasisinnaavarali kalaallisut allassimanissaannik kissaateqartoqarmat. Maannakkuugallartoq qallunaatuinnaq saqqummiussinnaavakka, taamaammat akeqanngitsumik kalaallisuunngortitserusuttoqarpat qujarutissaqaara, Lars Bo Bjørknæs oqarpoq.
Allaaserisat assigiinngitsut kamassaqarpasillutillu saassutarinnippalaarnerat Naja Paulsenip aamma tupigaa. Lars Bo Bjørknæsilli uparuaaneq tunngavissaqarsorinngilaa.
- Allaninngaanniit allaanerusumik allaaserinneriaaseqanngilanga. Misigisimavungami allaaserinneriaasera AG-llu politikerit nuimasut aningaasanik atornerluinerannut tunngasumik allaaserinneriaasia assigiittorujussuusut, Aviisi.gl-imik pilersitsisoq oqarpoq.
Aviisi.gl-imi allaaserisani ilaatigut Gerhardt Petersen aamma Siumup siulittaasua Aleqa Hammond pasillerneqarput.
- Pineqartut nittartakkami allaaserisat nikassaanertut nalilerunikkit eqqartuussisunut unnerluutiginnissinnaapput,Lars Bo Bjørknæs oqarpoq.
naammagittaalliutinik maannamut aamma tigusaqarsimannginnerarpoq.
