Aviisi: Steen Lynge aamma akiligassaqarsimavoq

Pisortat aningaasaataannik atornerluisimanermut nalunaarusiaq naak Grønlandsbankimi boksimi toqqorluarneqarsimagaluartoq aatsaallu qinersinerup kingorna saqqummiuneqartussaagaluartoq, Atuagagdliutit allagaatinik paasitinneqarsinnaanermik arlalinnik qinnuteqaateqareerluni, paasissutissanik saqqummiussimmat Aleqa Hammond kisimi Namminersorlutik Oqartussanut akiligassaqarsimanngitsoq paasinarsivoq.

Allattoq Elisa Isaksen

novembarip 12-at 2014 14:08

Kisitsisit Atassut sinnerlugu Peqqissutsimut Attaveqaatinullu Naalakkersuisuusimasumut Steen Lyngemut tunngasut ilungersunarnersaapput.

Aviisimi oqaatigineqartut naapertorlugit taanna 50.000 koruuninik akiligassaqarpoq, tamatumani pineqarlutik sulinermut atatillugu Kujataanut Danmarkimullu, 2013-imi decembarimi 2014-imilu aasakkut angalanerit pineqarput, taakkunani Steen Lyngep ilaquttani angalaqatigisimagamigit.

Aamma atuaruk Aleqa pillugu suliaq Namminersorlutik Oqartussanit nassuiaatigineqartoq

Angalanerit taakku nammineq akilertussaallugit Steen Lyngep Naalakkersuisoqarfiatalu maluginngitsoorsimavaat, aatsaallu Aleqa Hammondip akiligassai septembari naalersoq saqqummiunneqarmata paasineqarluni.

Akiligassat akilerneqareerput, aamma Steen Lyngep Naalakkersuisoqarfigisimasaata, Steen Lyngemut akiligassiisimannginnini akisussaaffigalugu oqaatigaa.

- Angalanerit taakku marluk oktobarip allaqqaataanni 2014-imi akiligassiissutigineqarput oktobarillu aappaanni akilerneqarlutik, Naalakkersuisoqarfiup inatsisilerituua allappoq.

Atassutip Atuagagdliutit saqqummiussai ippassaq unnukkut tusagassiuutinut nalunaaruteqarluni oqaaseqarfigai, partiimiillu akiligassat akilerneqarsimannginnerat ajuusaarutigineqarpoq, peqatigitilluguli akiligassat akilerneqarsimannginnerannut Naalakkersuisoqarfiup kukkusumik suliaqarsimanera tikkuarneqarluni.

Tamatumunnga peqatigitillugu partiip erseqqissarpaa, Steen Lyngemut tatiginninnertik minnerulersimanngimmat qinerisinissamullu qinigassanngortinnera tamakkiisumik tapersersoritsik.

Aamma Steen Lyngep ilaquttani isumasioreerlugit qinigassanngortinnini attatiinnarniarlugu aalajangiusimavaa soorlu allattoq "qinikkatut suleqqissinnaanissannut imminut tunniullunga qinersisartut saaffigaakka".