Aviisi: Pituffimmi sakkutooqarfiup eqqartuussivimmit inerniliiffigineqarnera tupaallannartumik erseqqittoq
Eqqartuussutip inernerata tamakkerlugu avammut nalunaarutigineqarnerata kingorna, aviisi Politiken taama allaaserisaqarpoq.
Ingerlatseqatigiiffiit pingasut, Greenland Contractorsip, MT Højgaardip Copenhagen Arcticillu amerikamiut sakkutooqarfiat pillugu naammagittaalliuutaata eqqartuussivimmit isumaqatigineqarnera KNR-imit maajip 28-iani oqaluttuaraarput. Tamannalu pivoq sakkutooqarfimmi ukiuni tullerni arfineq-marlunni atuuttussamik kiffartuussinissamik isumaqatigiissutip suliffeqarfimmut amerikamiunit pigineqartumut Exelis Services A/S-imut amerikamiut sakkutooqarfiata siorna oktobarip qaammataani tunniussaqarnerata kingorna.
Tamannalu pivoq Kalaallit Nunaata/Danmarkip USA-llu akornanni illersornissaq pillugu isumaqatigiissutaasumi kiffartuussinissamik isumaqatigiissutip kalaallit imaluunniit danskit suliffeqarfiutaannut taamaallaat tunniunneqarsinnaanera naqissuserneqarsimagaluartoq.
AAMMA ATUARUK Pituffimmi kiffartuussinissamik isumaqatigiissut Exelis Servicesip annaavaa
Isumaqatigiissullu taanna amerikamiut sakkutooqarfiannit unioqqutinneqarsimasoq eqqartuussivik eqqartuussummini inerniliivoq.
Copenhagen Business Schoolimi ingerlatseqatigiiffiit pillugit inatsisiliorneq pillugu lektori Troels Michael Lilja naapertorlugu, USA-mi eqqartuussiviup nunap nammineq sakkutooqarfiata aalajangiineranik atorunnaarsitsinera tupaallaatissaavoq.
Aamma kiffartuussinissamik isumaqatigiissutip Exelis Servicesimut tunniunneqarneratigut amerikamiut sakkutooqarfiata 64 millionit dollarsinik sipaaruteqarsinnaasimagaluarnera apeqqutaatinneqanngilaq. Eqqartuussutimmi inernera naapertorlugu, Kalaallit Nunaannut Danmarkimullu politikkut attaveqarneq aningaasanit pingaarnerutinneqarpoq, Troels Michael Lilja taama oqarpoq:
- Suliariumannittussarsiuussinermi piumasaqaataasut qaangiinnarneqarput, kiffartuussinissamillu isumaqatigiissutip tunniunneqarsimanerata attatiinnarneqarneratigut politikkikkut qanoq kinguneqaratarsinnaaneranut naleqqiullugu 64,8 millionit dollarsit aningaasamineerannguuneri tunngavilersuutigineqarluni.
AAMMA ATUARUK Suliffeqarfiit US Air Forcemut kiffartuussinissamut isumaqatigiissut pillugu maalaarput
Exelis Services, isumaqatigiissummik annaasaqartoq, eqqartuussiviup eqqartuussutaata inernerata suliassanngorteqqinnissaanut suli periarfissaqarpoq.
Pituffimmi sakkutooqarfimmi oktobarip aallaqqaataata kingorna kikkut kiffartuussinissamik isumaqatigiissuteqarfigineqassanersut suli ilisimaneqanngilaq.