Aviisi: Naalakkersuisut neriorsuutaat milliarderpassuarnik naleqassapput
Ilaatigut mittarfiliornissamik pilersaarut suliffeqarfiillu minnermik akileraaruteqarlernissaanik pilersaarut, katillugit milliardit koruunit sinnerlugit inuiaqatigiinnut akissaajaataasussat, Naalakkersuisooqatigiilersullu isumaqatigiissutaanni neriorsuutaasut, qanoq Nunatta karsianit akilersorneqassanersut apeqquserneqarluni.
Aviisimi Informationimi apersorneqartup, Copenhagen Business Schoolimi lektorip Lise Lyckip, Naalakkersuisooqatigiilersut neriorsuutaat ernumanartutut isigaa.
Milliard koruunit sinnerlugit Naalakkersuisooqatigiilersunit aningaasartuutigineqarnissaannik pilersaarutit, aningaasassaqartinneqassanngitsut ilimagalugu, aviisimut Informationimut Lise Lyckip oqarpoq.
IA aamma apeqqusiivoq
Aviisimi aamma apersorneqarpoq, Inuit Ataqatigiit siulittaasuat, Sara Olsvig. Taanna Naalakkersuisooqatigiilersut isumaqatigiissutaat pillugu oqarpoq, isumaqatigiissummi allassimasut arlallit Inuit Ataqatigiit politikkiannit tiguneqarsimammata nuannaarutigalugu.
Suliassalli pilersaarutigineqartut aaqqissuusseqqinnerillu sumingaanniit aningaasalersorneqassanersut, Sara Olsvigip apeqquserpaa.
- Suliassanut tamakkununnga aningaasartuutissat arlaanniit aaneqartariaqarput. Imaassinnaavoq sipaarniarnikkut imaluunniit aningaasanik allamiit allamut nuussinikkut tamanna pissasoq, taamaassappallu tamanna Naalakkesuisooqatigiilersut politikkeriniagaannut tulluartuussaaq, Inuit Ataqatigiit siulittaasuat, Sara Olsvig aviisimut Informationimut oqarpoq.
