Aviisi: KANUKOKA Aasiannut nuunneqassaaq
Kommuneqarfik Sermersuup kommunit kattuffiannit ukiortaamit ilaasortaajunnaarnerata kingunerisaanik, KANUKOKA-mi januaarip qaammataani immikkut ittumik ataatsimeersuartoqarmat kommunit kattuffiata Nuummit nuunneqarnissaa aalajangiunneqarpoq.
Ataatsimeersuarneq sioqqullugu oqaatigineqaraluarpoq allaffissornikkut suliassat kommuninut ilaasortaasunut agguataarneqassasut, KANUKOKA-mili siulittaasunngortup allaffissornerup allaffeqarfimmit ataatsimit aqunneqarnissaanut januaarimi ataatsimiinnermi tapersersorneqarpoq.
Allaffeqarfiulli illoqarfimmi sorlermi inissisimanissaa taamani aalajangiiffigineqanngilaq.
Aamma atuaruk KANUKOKA-mi suleriaaseq ersarinnerulissaaq
Atorfilittanik suleqatigiissitat allaffeqarfiup sumut nuunneqarnissaanik siunnersuuteqartussat kingorna pilersinneqarput. Suleqatigiissitallu siunnersuutaat KANUKOKA-mi siulersuisut tallimanngorpat ataatsimiinneranni saqqummiunneqassaaq.
- Siunnersuutaavoq qularnanngitsumik Aasianni nuannaarutigineqarumaartoq, aviisip Atuagagdliutit tusarfia taama ilisimatitsivoq.
KANUKOKA-lli siulittaasuata Palle Jeremiassenip taama paasissutissiisoqarnera uppernarsarumanngilaa.
- Tamanna oqaaseqarfigissanngilara, sumummi nuunneqarnissaa tallimanngormat ataatsimiilerutta aatsaat aalajangiiffigineqartussaavoq, Palle Jeremiassen KNR-imut taama oqarpoq.
Aamma atuaruk KANUKOKA-p inissimaffissaa suli aalajangerneqanngilaq
Aamma atuaruk KANUKOKA-p allaffeqarfia aggulunneqassanngilaq