KANUKOKA-mi suleriaaseq ersarinnerulissaaq
Malittarisassat nutarterneqarnerisigut siulersuisut aalajangiiffigisinnaasaat ersarissarneqarput, allattoqarfimilu suliat aalajangersimasut inerisarneqarnissaat anguniarneqarput, kommunit kattuffianni pisortaq Hans-Peder Barlach Christensen taama oqarpoq.
- Malittarisassat nutaartaat tassaavoq, KANUKOKA-p siunertaa ersarsisarneqarmat, taama nassuiaateqartoq KANUKOKA-mi pisortaq Hans-Peder Barlach Christensen, KANUKOKAp sapaatip akunnerata naanerani Ilulissani immikkut ittumik ataatsimeersuarnerani malittarisassat allanngortinneqarnerisa kingorna.
Ataatsimiinneq aallartitat ataatsimiinnerisa kingullersaraat.
Aamma atuaruk KANUKOKA-p inissimaffissaa suli aalajangerneqanngilaq
Aallartitat ataatsimiittarnerat KANUKOKA-p 1972-mi pilersinneqarneranut atatillugu atuutilersinneqarpoq, maannalu tassa siunissami kommunit KANUKOKA-mi ilaasortaasut aningaasaqarnermut ataatsimiititaliaat KANUKOKA-p ukiumut ataatsimeersuarnerani oqartussaanerpaanngussallutik.
Hans-Peder Barlach Christensenip ilanngullugu oqaluttuaraa siulersuisut aalajangiisinnaanerat allanngortinneqartoq.
- KANUKOKA-p siulersuisuisa aalajangiiffigisinnaasaat ersarissarneqarpoq, taakkualu qanoq ingerlanneqarnissaat erseqqissarneqarpoq, Hans-Peder Barlach Christensen oqarpoq.
Aamma atuaruk Kommuninik ilisimatooq: KANUKOKA-p agguataarnissaa unammilligassatuaanngilaq
KANUKOKA kommuninut ataatsimoortunik tapiissutit aamma isumaqatiginniarnerit pillugit Namminersorlutik Oqartussanik isumaqatiginniartarpoq isumaqatiginniarnermilu angusarineqartut KANUKOKA-mi siulersuisuinit akuerineqartassapput.
Tamanna Kommuneqarfik Sermersuumut kinguneqassaaq ukiup nikinnerani KANUKOKA-mit ilaasortaajunnaarluni animmat.
KANUKOKA-p Namminersorlutillu Oqartussat sulisut kattuffiannik isumaqatiginniarnerinut Kommuneqarfik Sermersooq sunniuteqassanngilaq.
- Kommuneqarfik Sermersooq KANUKOKA-mit ilaasortaajunnaarpoq, taamaattumik isumaqatigiissutigineqartut, isumaqatigiissutit KANUKOKA-p pilersitai aalajangersaavigisai, Kommuneqarfik Sermersuup malittussaavai, piumaguni piumanngikkaluaruniluunniit, Kommunit kattuffianni KANUKOKA-mi pisortaq Hans-Peder Barlach Christensen taama oqarpoq.
Kommuneqarfik Sermersuup borgmesteria Asii Chemnitz Narup tamanna pillugu KNR-imut mail-ikkut ima allappoq:
- KANUKOKA aamma Namminersorlutik Oqartussat isumaqatigiinniartartut ilisimavarput taamaattumillu isumaqatigiinniarnermi kissaatigisatsinnik pisinnaatitaaffeerulluta.
Aamma atuaruk KANUKOKA-p allaffeqarfia aggulunneqassanngilaq
- Manna tikillugu kissaatigisatsinnik tusaaniarneqarsimasutut misigisimanngilagut, taamaattumillu periuserineqartut allannguuteqangaarnissaat naatsorsuutiginngilarput, Asii Chemnitz Narup taama allappoq.
KANUKOKA-p allaffeqarfiata illoqarfimmut allamut nuunissaa pillugu KANUKOKA-p siulersuisui marsip aallaqqaataa nallertinnagu aalajangiissapput.
Hans-Peder Baralch Christensenip oqaatigiumanngilaa, allaffeqarfik illoqarfimmut allamut nuunneqarpat nuussanerluni imaluunniit suleqataasut allat nuunnissaminnik kissaateqarnersut. Allaffeqarfik illoqarfimmut allamut nuunneqarpat sulisut arfineq marluk sulisorineqassapput.
