Aviisi: Atlantikup avannaamiut ilaasortaatitaasa oqallisaanerat Tuluit Nunaanni oqallinnermut assinguvoq
Aviisi Jyllands-Posten taama allaaserisaqarpoq.
Folketingimut ilaasortap Savalimmiuneersup Sjurdur Skaalep atlantikup avannaamiut danskit Folketingianni issiatitaqarnissaat pisariaqarnersoq ippassaq apeqquserpaa, Kalaallit Nunaata Savalimmiullu susassaqarfiit peqataaffigisartagaasa ikittuinnaaneri, pingaartumik nunanut allanut sillimaniarnermullu politikki, innersuussutigalugit.
Atlantikup avannaamiut danskit inatsisaat pillugit taaseqataasinnaanerisa, danskillu taakkununnga tunngassuteqartunut taaseqataasinnaannginneri, imminnut assortuuttutut inissisimanerat Skaalep aamma tikkuarpaa.
Oqallinnerlu taama ittoq Tuluit Nunaanni 1977-imiilli ingerlasimavoq, Skotland, Irlandip avannaa Walesilu tuluit inatsisartuini issiatitaqarlutik. Nunanit taakkunaneersut tuluit inatsisaat pillugit taaseqataasinnaapput, naak Tuluit Nunaannit nunat namminersortitat inatsisaat taaseqataaffigineqarsinnaanngitsut.
AAMMA ATUARUK Savalimmiormiu: Atlantikup avannaamiut Folketingimi issiatitaqarunnaassappat?
Tamannalu ukiuni 40-nngulersuni oqallisaasimagaluartoq suli aaqqiissuteqarfigineqanngilaq. Aviisili Jyllands-Posten naapertorlugu, ministeriunerup David Cameronip ajornartorsiut aaqqiissuteqarfiginiarlugu, nunat namminersortitat susassaqarfiit taaseqataaffigisinnaasaat ikilisinniarlugit sulissuteqarpoq. Nunat namminersortitat suliani inatsisartuni tuluit amerlanerussuteqarfigisaanni akimmisaartitsinnginnissaat Tuluit Nunaata taamaasilluni qulakkeersinnaavaa.
Sjurdur Skaalep oqariartuutigisai nunatsinnit suli oqaaseqarfigineqanngillat, Danmarkimili Folketingip siulittaasua Mogens Lykketoft isumaqarpoq Kalaallit Nunaat Savalimmiullu Folketingimi issiatitaqaannartariaqartut.
