Aviisi: Kinamiut aatsitassarsioqatigiiffiat Issittup imartaatigut assartuisarniartoq

Aatsitassarsioqatigiiffiup Hongkongimeersup General Nice Groupip Nunatsinni London Miningimik ingerlatsisussanngornerata kingorna saviminissamik piiaavimmut tunngatillugu qanoq pilersaaruteqarnersut pissanngatigineqarpoq.

Tusarfiup kinaassutsiminik saqqummiusserusunngitsup nittartakkamut nutaarsiassaqartitsivimmut wantchinatimes.com-imut oqaatigaa, ingerlatseqatigiiffiup Kinamut assartuinissani Issittup imartaatigut ingerlanniarlugu pilersaaruteqartoq, taamaaliornikkut saviminissamik Kangianut assartuineq sivikinnerullunilu akikinnerussammat.

Nunarsuup kissatsikkiartorneratigut Issittup imartaa russinit amerikamiunillu angallavigineqaleraluttuinnarpoq. General Nice Groupilu tamaanaqqulluni assartuinermigut annertuumik sipaaruteqarsiinnaassappat, Kalaallit Nunaata pinngortitaani pisuussutinik, savinissamissamik, kanngussamik, uranimik, zinkimik, gassimik pinngortitameersumik uuliamillu qalluinissamut aningaasalersuerusussinnaasunik pissarsiniarnissaq ajornannginnerulissaaq.