Avataq: Uukapaatitsiniarnerupput inuillu oqartussaaqataanerannik sumiginnaanerulluni

Paasissutissalli aluminiumik tunisassiornermut tunngasut tamarmik uukapaatitsiniarnerupput, inuillu oqartussaaqataanerannik sumiginnaanerulluni.

Pinngortitaq avatangiisillu pillugit peqatigiiffiup Avatap siulittaasua Mikkel Myrup taama oqarpoq:

- Paasissutissat pingaaruteqartut qinikkallu aalajangiinissaannut tunngaviusussat tutsuiginanngillat. Paasissutissat uukapaatitsiniarnertut nalilerneqarsinnaapput, aluminiumik tunisassiortut namminneq iluarisatik saqqummiuppaat, inuillu oqartussaaqataanerannik tamanna sumiginnaaneruvoq, Mikkel Myrup oqarpoq.

Aluminiumik tunisassiorneq ataatsimut isigissagaanni avatangiisinut mingutsitsinerpaanut ilaavoq. Aatsitassaq bauxit aluminiuliornermi akuiaanermi atorneqartarpoq, mingutsitsinerpaanullu ilaalluni. Mikkel Myrup oqarpoq, Alcoallu Australiami akuiaavii assersuutigalugit:

- Alcoap Australiami akuiaavii mingutsitsisarsimapput, inuit peqqissusaannik innarliisarsimallutik. Inuit ilaatigut kræfteqalersimapput, sapigaqalersimallutilluunniit. Alcoa akiliisussanngortinneqartarsimavoq, malittarisassalli unioqqutinnagit Alcoa akuiaasarnerartarsimavoq, Mikkel Myrup oqarpoq.

Aatsitassanut inuussutissarsiutinillu naalakkersuisoq Ove Karl Berthelsen, Alcoap Maniitsumi alumiiniumik aatsitsiviliorsinnaanera pillugu Inatsisartuni ippassaq saqqummiussivoq, ilaatigullu ima oqarluni, issuaaneq aallartippoq:

- Alcoap aatsitsiviliornissaanut uniffiusinnaasunik taamaatitsinissamullu tunngaviusinnaasunik naammattuugaqanngilagut, Ove Karl Berthelsen oqarpoq.

Mikkel Myrupip, pinngortitaq avatangiisillu pillugit peqatigiiffik Avataq sinnerlugu tusagassiutinut nalunaarummi ilaatigut piumasaraa aatsitsiviliornissaq taamatikkallarneqartariaqartoq.