Avatangiisit illersorneqarnissaannut inatsiseqalissaaq

Tamatumunnga pissutaavoq, siullermik tusarniaasoqarmat apeqqutigineqartut pitsaangaarmata siunnersuummut ilassutigeriarlugit tusarniaasoqaqqimmat.

Peqqussutit tallimat ataatsimut inatsisaasut maanna assiginngitsorpassuartigut avatangiisit mingutsinneqannginnisaannut piareersimaffigeqqussutit paasiuminartupilussuupput - pisinnaasut aarlerigineqartut ullumikkut takorloorneqarsinnaanngitsulluunniit pillugit Naalakkersuisut iliuuseqarsinnaanissaminnut sakkussaqartitsillutik.

Naalakkersuisut kommunillu akisussaaffii inatsimmi 19-inik quppernilimmi ersarissarneqarput. Nalinginaasumik inatsisit naapertorneqarneri kommunit nakkutigissavaat. Namminersorlutilli Oqartussat assigiinngitsutigut akisussaaffii aamma ersaripput. Minnerunngitsumik suliffeqarfiit immikkut ittumik mingutsitsitillugit.

Inatsisip erseqqissarneqarnera silaannarmik, imermik, sikumik, qaqqanik, nunamik nipimillu mingutsitsinaveersaarnissamik siunertaqarpoq. Inuit peqqinnissaq pillugu illersorneqarnissaat atortussanillu atuinernik killilersimaarinissaq atuipiluisoqannginnissaalu inatsimmi erseqqissarneqarput.

Inatsimmi nutarsarneqartumi nunat tamat inatsisiliornerminni periusaat pitsaanerpaat naapertorneqarsimapput. Taakkununnga ilaanngullugu mingutsitsisup nammineq akiliisarnissaanut tunngasoq. Taamaalilluni nunat tamat inatsisaannut ullumikkut atuuttunut kiisalu akisussaaffinnut atatillugu pituttorneqarsimanerannut naapertuuttumik Kalaallit Nunaat avatangiisit illersornissaannut inatsiseqalissaaq. Tamakkuali oqaatigereerlugit eqqarsaallannartoqarpoq. Tassami uuliasiulersut aatsitassanillu tunisassiulersut inatsit uani pineqartoq naapertorlugu ullumikkut malersorneqarsinnaanngillat. Taakkuami aatsitassanut inatsit maliinnartussaavaat.

Taamatut aaqqiinerup pitsaaqutai ajoqutaalu avatangiisinik illersuiniaqatigiiffiit immikkullu ilisimasallit suli assortuutigisarallassagunarpaat.