Avatangiisinut Aningaasaateqarfik qinnuteqarnissamut ammarneqartoq
Suliniutinullu avatangiisinut ilaqutaasussanut aningaasatiguttapiiffigineqarnissamik aningaasaateqarfimmut qinnuteqartoqarsinnaanngorpoq, Naalakkersuisut taama nalunaaruteqarput.
Ukiut tamaasa sulianut, avatangiisinut iluaqutaasussanut aammalu avatangiisit pillugit sulianut, periutsit nutaat atorlugit pissutsinik misissuisarnissamut aningaasanik immikkoortitsisoqartassaaq. 2019-imilu suliassat aningaasanik qinnuteqarfiusinnaasut marlunnut immikkoortinneqarput:
Suliniutit, plastikkinik atuinermik annikillititsinissamut atueqqinnissamullu tunngasut.
Suliniutillu, aalisakkanut qassutinut atortunullu qimatanut imaluunniit annaasanut aammalu aalisarfinnik piniarfinnillu eqqiluitsuutitsinissamut tunngasut.
Immikkoortut marluusut tamarmik immikkut 1 millionit koruuninik tapiissutissatut immikkoortitsisoqarpoq.
- Uatsinnut kinguaariinnullu tulliuttunut nuannaarutaasumik – avatangiisit pitsaasumik illersornissaat suli atorfissaqartipparput, Pinngortitamut, Avatangiisinut Ilisimatusarnermullu Naalakkersuisoq Siverth K. Heilmann taama oqarpoq.
AAMMA ATUARUK Avatangiisinut aningaasaateqarfiliornissaq Inatsisartuni amerlanerussuteqartut tapersersorpaat
- Taamaattumik ukioq manna suliassat suut Avatangiisinut Aningaasaateqarfimmut siunnersuutaassanersut takunissaannut pissangavunga.
Assersuutigalugu kommunit, inuussutissarsiutinik ingerlatallit, atuarfinni atuaqatigiit innuttaasullu nalinginnaasut Avatangiisinut Aningaasaateqarfimmut aningaasanik qinnuteqarsinnaasut, tusagassiorfinnut nalunaarummi atuarneqarsinnaavoq.
Taakku saniatigut Avatangiisinut Aningaasaateqarfik 2019-imi kommunini biilikunik eqqaanermi sulianut, aammalu nuna tamakkerlugu ataatsimoortumik eqqagassalerinissamik pilersitsiniarluni kommunit tamarmik suleqatigiinnerannut tapiissuteqassaaq.
Avatangiisinut Aningaasaateqarfik uani annertunerusumik paasisaqarfigineqarsinnaavoq, qinnuteqarfissaq tassani aamma pissarsiarineqarsinnaavoq.
Qinnuteqarnissamut maajip aallaqqaataa 2019 killigitinneqarpoq.