Avatangiisinik mingutsitsineq oqaluuseraat
Mestersvigiimi pissutsit saniatigut Daneborgimi Station Nordimilu uuliakoornerit qaammat kingulleq pisut, Anthon Frederiksenip Gitte Lillelund Bechillu ataatsimiinneranni oqallisigineqarput.
- Pisinnaasaq tamaat uuliakoornerit pinngitsoortinnissaat pissusissamisoortuuvoq, ilaannikkulli ajutoortoqartarpoq, atortut ajutoornerisigut imaluunniit inuit kukkuluttornerisigut, Anthon Frederiksen Gitte Lillelund Bech marluullutik tusagassiuutinut nalunaaruteqarlutik taamatut allapput.
Sakkutooqarfinni sulisunut erseqqissaatigineqassaaq uulianut tankit immerneqarnerini imaluunniit uuliat nuunneqarnerini tamatigut nakkutigineqartassasut.
Station Nordimi Daneborgimilu uuliakoornerit kingorna Naalakkersuisut isumaqatigiipput suleriaatsitsigut sukaterisoqassasoq, taamaalilluni uuliakoornerit siunissami pinngitsoorneqarsinnaalerlutik.
Illersornissamut ministerip Gitte Lillelund Bechip kaammattorneqarnermigut aamma nalunaarutigaa Kalaallit Nunaanni sumiiffinni assigiinngitsuni siusinnerusukkut amerikamiut eqqaaveqarfiini pissutsit misissornissaannut piareersimanissamut akuersaarluni.
