Avataarsualiartartoq Andreas iluatsittumik aallarmat nulia eqqissiallaqaaq
Qallunaaq avataarsualiartartoq siulleq akunnerit qulit qaangiupput silaannarsuarmut aallartinneqarmat.
Pilersaarutillu tamaasa malillugit maannamut suna tamarmi ingerlammat ilaqutaasut oqiliallaqqaqaat.
- Aatsaat taama misigisamik tupinnartigisumik uanga misigisaqarpunga. Qissasiinnarpunga, ilimagaraaralu nuannaangaarama taamaattunga, takusinnaagakkumi sinnattorisuaannagaa eqquuttoq, Cecilie Beyer qallunaap avataarsualiartartup nulia, taama oqaluttuarpoq.
Aamma atuaruk ASSIT Qallunaaq avataarsualiartartoq ajunngitsumik aallarpoq
Nakkutilliivimmiit malinnaavoq
Avataarsualiarnerlu Kasakhstanimit malinnaaffigaa.
Aallartinneqarnerani silamiit isiginnaarpoq, avataarsuarmiittumullu ikaartaat putsunut tarrimmat nakkutiginnittarfiliarpoq.
Tassani tv-kkut malinnaaffigisinnaavaa, silaannartatsinniit ingerlaarnera ulorianaqisoq minutsinik arfineq pingasunik sivisussuseqartoq uiata qanoq iluatsinneraa.
- Aqutsisuni peqatigalugu qungujulavoq eqqissisimaqqissaarlunilu, tupinnarluinnarpoq, Cecilie Beyer nuannaaqisoq eqqissiallaqqaqisorlu DR-mit Steffen Kretzimut taama oqarpoq.
Kukkunatik angalaniartussaapput
Qallunaaq avataarsualiartartoq Andreas Mogensen tassa avataarsualiarneranit akunnerit qulit qaanngiupput.
Angalaneranullu anguniagaavoq avataarsuarmittoq rumstationi ISS tikinnissaa, taannalu pilersaarutit malillugit tallimanngorpat apuuffigissavaat.
DR-ip Moskvami aallartitaa Matilde Kimer malillugu, avataarsualiartartut ingerlaarnerminni suliassakinngillat.
- Nalunngilarput angalaffimmi pisinnaasaat maanna misissuleruttoraat, ingerlaarnerminnilu nakkutiginnittarfimmut nunarsuatsinniittumut attaveqatigiiginnavipput, ingerlaarfitsik eqqarsaatigalugu aaqqitassamineeqqat suliariuartaramikkit. ISS-mut kattutissagaanni nikingaqqusaanngilluinnarput, taamaattoq ingerlaarnerminni aaqqissuteqalaartuaannarput, Mathilde Kimer oqarpoq.