ASSIT Qallunaaq avataarsualiartartoq ajunngitsumik aallarpoq
Avataarsualiartaatip aallartinneqarnissaanut pilersaarutit ajunngitsumik malinneqarmata, Andreas Mogensen avataarsualiartartoqataasalu marluk, tassa Ruslandimiup aamma Kazakhstanimiup ajunngitsumik aallarnertik arlaleriarlutik nalunaarutigisareerpaat.
- Avataarsualiartaammik aallartitsisut avataarsualiartaat ingerlallualersoq nalunaarutigigaat, Nunat Tamalaat Avataarsualiartitseqatigiiffiata ISS-ip Twitterimi quppernermini allaaseraa.
Avataarsualiartaatinik aallartitsinermi minutsit siulliit qulingiluat ajutoornissamut qaninnerpaasarput, motoorinimi nakkutigineqartumi qaartitsisarnerit ajutoorfiusinnaasarmata.
Sojusili pilersaarutit naapertorlugit aallartinenqarpoq, minutsillu qulit qaangiunneranni Nunarsuarmik kaaviilerluni.
Tamanna pillugu Kazakhstanimi illoqarfimmi Baikonurimi avataarsualiartaammik allartitsiviusumi ersaartaattoqarpoq, tassanilu Andreas Mogensenip ilagisaasa aallartinneqarnera aamma malinnaavigaat.
