Avannaata Qimussersua noorataannaavaat
Pilersaarutit malillugit Avannaata Qimussersua ingerlanneqartussaagaluarpoq arfininngornermi marsip 26-anni peqataasussallu sapaatip akunneranik sioqqutsillutik tikeralertussaagaluarlutik.
Anorleqattaarneranilli peqquteqartumik kitaani sikorsuit Attup Sisimiullu akornannut tipisimapput.
- Peqataasussat Kangaatsiamiit, Aasianniit, Qeqertarsuarmiit Qasigiannguaniillu angallatinik Sisimiuliartussaagaluarput. Sikoqarpallaarmalli imaatigut aqqutissaat assertissimavoq angallatinit angisuunit allaat aqqutigineqarsinnaajunnaarluni, Avannaata Qimussersuani siulittaasoq Mikkel Jeremiassen KNRimut oqarpoq .
Iluliarmiut, Saqqarmiut Qeqertarmiullu katillutik qimussit arfineq pingasut Dash 7 atorlugu Sisimiunut timmisartuunneqartussaagaluarput. Qimussilli 20-it angallatit atorlugit Sisimiunut ingerlanneqartussaasimagaluarlutik ingerlavissaralualli imaq maanna sikorsuarnit asserneqarsimavoq.
- Maanna peqataasussat peqatigiiffii peqatigalugit isummerfigisussanngorparput Avannaata Qimussersua illoqarfimmut allamut nuunneqassanersoq, Mikkel Jeremiassen oqarpoq.
Oqarasuaatikkut ataatsimiinneq nalunaaqutaq tallimanut aallartissaaq.