Avannaani isummerfiusumik taasisitsinissaq ullulerneqarpoq

Qularnarunnaarpoq. Marsip 25-ani innuttaasut isummerfigalugu taasissutigissavaat. Kommunalbestyrelsip tamanna aalajangerpaa, taasisitsinissamullu periareersarnerit aallartereerput. Taasisitsinissarmi sioqqullugu kommuunip avinneqarnissaanut isumaqataasunut isumaqataanngitsunullu paasisitsiniaasoqaqqaassaaq:

- Aalajangiussarlu tassaavoq ataatsimiititaliaq kikkut tamat oqartussaaqataanerannik ilaatigut suliaqartoq suliakkerneqassasoq makkuninnga: Paasisitsiniaalluni angalasoqarnissaanut pilersaarummik sanassasoq, aammalu taasisitsinissami angalanissat ineqarnissallu aningaasatigut qanoq naleqarnissai missingersuusiussagai, Qaasuitsup Kommuniani borgmesteri Siumumeersoq, Ole Dorph, oqarpoq.

Taasisitsinissarlu sioqqullugu aamma, kikkut tamat oqartussaaqataanerat, kommune, attaveqatigiinneq attaveqaatinullu ataatsimiisitaliaq, paasisitsiniaanissap qanoq kommuunimut aningaasartuutaanissaanut missingersuutinik saqqummiussissaaq:

- Tassalu taakkua apeqqutit naammassereerpagit kommunalbestyrelsi immikkut ittumik ataatsimiisinneqartussaassaaq, immaqa sapaatip akunnerata ataatsip iluani. Kisianni ataatsimiisitaliaq suli sulivoq, taamaattumik suli tuttaveqanngilaq, Ole Dorph oqarpoq.

Tamatuma kingorna kommunalbestyrelsimi ilaasortat kommuunimilu atorfilittat isorartussutsimigut nunarsuarmi kommuunit annersaanni paasisitsiniaallutik angalassapput.

Qaasuitsup Kommunia angisussaa pillugu innuttaasut isummertillugit taasitinneqareerpata, kommunalbestyrelsi  Naalakkersuisunut Inatsisartunullu kommuunip avinneqarnissaanut inassuteqarsinnaavoq.