Avanersuarmi piniartut takornarianit inagingaasutut misigipput
- Assorsuaq isumaliornarpoq. Susunukua? Uagutsinnut aperinarsisoq, immaqaana inagerniaraatigut piniartarfitsinnut akornusersuisutut? Immaqa "inatsisaatsut", Piniartoq Qaanaarmiu Rasmus Avike taama oqarpoq.
Qaanaamiit 150 kilometerisut avannarpasitsigisoq, Eeta, Avanersuarmiut ukiaanerani tuttunniarfigalugulu umimmanniarfigisarpaat.
Ornitassaq ungasimmat piniartut piffissaq atorluarniartarpaat.
Kisianni immap aasani kingullerni sikukinnerusaleriartorfiani tuttunniarfiutillugu umimmanniarfiutillugulu umiarsuarujussuit takornariartaatit aamma Eetap qanittuanut pisalersimapput, umiatsiarsuit gummibådit qulimiguullillu atorlugit takornariartoqartalerluni.
Taamalu pisoqartalernera piniartunut ajornartorsitaavoq.
- Soorlu ungasinngitsukkut Eetap pavaniikkatta, takornariartaat taavaniittoq. Unnueqqaarluta tuttunniariartorluta aallaqqaaratta gummibådit qulit sinnitsiarlugit amerlassusillut inunnik ulikkaartut Eetap Kangerluanut pulapput, Rasmus Avike oqaluttuarpoq.
Eetalli qinnguani takornariat gummibådinik tikillutik nipiliortarnerat kisimi ajornartorsiutaanngilaq Aamma qulimiguullit, umiarsuarnit tajornariartaassuarnit atorneqartut, nujutsitsisartut, Rasmus Avike oqarpoq.
Taassuma oqarneratut, nipiliorneq annertusiartuinnaleraangat, uumasut nujuartat ungasillingaluttuinnartarput. Silaannaallu kianneruleriartornera ilutigalugu sikukinnerusaleriartornerata malitsigisaanik takornariat amerlanerujartortut piniariartarfinniittalernissaat, Rasmus Avikep aarleqqutigaa. Neriupporlu piniarfinni takornariartarneq pillugu erseqqinerusumik malittarisassaqalissasoq:
- Silap kiatsikkiartorneratigut sikukinneruleriartornera najooqutaralugu takornariat sikulimmut tikittarnerat akulikilliartussammat, inatsisiliuunnissaa malittarisassaliuunnissaaluunniit eqqarsaatersornarsivoq.
