Avammut tunisassiat akiisigut suli assigiinngissut annertuvoq

KNAPK-p, akit pillugit misissueqqissaareerluni misissuinerit inerneri juunimi saqqummiummagit oqallittoqangaatsiarpoq, saqqummiussanimi takuneqarsinnaavoq kalaallit aalisartut pisatik, nunani sanilerisaminni aalisartunut sanilliullugit, annikippallaarujussuartumik aningaasarsissutigisaraat.
Allattoq Carla Davidsen
septembarip 19-at 2011 06:46

Misissueqqissaarneq kisitsisinik nutaanik maanna ilaartorneqarpoq, 2010-mi kisitsisit ilanngunneqarlutik, kalaallillu aalisartut isaannit isigalugit taakku suli ajornerupput.

Soorlu nillertup raajai eqqarsaatigalugit kalaallit aalisartuisa 2010-mi kiilumut 6 koruunit 33 oorisissutigisarsimavaat. 2009-mut naleqqiullugu suli akikinnerusimallutik. Canadami nillertup raajaasa akii piffissami tassani qaffassimapput, 2010-mi kiilumut 8 koruunit 84 ooreqarsimallutik.

Danmarkip eqqussuinermi avammullu tunisinermi akigititai malunnartorsuarmik aamma assigiinngissuteqarput. Raajat qerisut qalipaajakkat Kalaallit Nunatsinneersut agguaqatigiissillugu kiilumut siorna 18 koruunit 55 ooreqarput, assersuutigalugulu Italiamut Danmarkimiit tunineqarunik 60 koruunit 68 oorilersinneqassallutik.

Qalerallit akii eqqarsaatigalugit, Danmarkimut eqqunneqarnerannut akinut sanilliullugit, Kalaallit Nunaanniit eqqussanut akigitinneqartunut aamma assigiinngeqaat. Nunanit allanit Danmark 2010-mi qaleralissisimaguni kiilumut 30-32 koruunilertarpai, Kalaallit Nunaanniilli taamaallaat kiilumut agguaqatigiissillugu 18 koruunilertarlugit.

Qaleralinnik tunisinermi akit nunani allani ukiuni kingullerni marlunni 25 procentip 57 procentillu akornanni qaffassimapput, nunatsinni taamaallaat 6 procentimik qaffassimallutik.

Nalunaarusiaq suliffeqarfik GEMBA Seafood Consultingimit KNAPK-mut suliarineqarpoq.

 

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq