Avaleraasartuut pillugit isumaqatigiissusiorsimasut oqaloqatigineqartussanngorput
Aalisarnermulli, Piniarnermut Nunalerinermullu Naalakkersuisoq Finn Karlsen Inuit Ataqatigiinnit Ane Hansenip paragraf 37 naapertorlugu apeqquteqaataanut akissuteqarluni allappoq isumaqatigiissusiortut kalaallit ineriartortitsiniarnerannut akornusiinissaq siunertarissappassuk akuerisinnaanagu, tamannalu tunngavigalugu nunat pineqartut saaffigineqassasut.
-Nunatsinni avaleraasartoorniarnermi ineriartortitsiniarnermut akornusersuissappata pinngitsoornata oqaloqatigisariaqassavavut, Aalisarnermut Naalakkersuisoq Finn Karlsen taama oqarpoq.
Avaleraasartuut pillugit Norgep, Savalimmiut EU-llu isumaqatigiissutaat nunatsinnut qanoq sunniuteqassanersoq, Naalakkersuisut qanoq iliorniarnersut kiisalu nunatta nunanut pineqartunut aalisarnikkut isumaqatigiissutigisartagaannut qanoq kinguneqartinneqassanersoq IA-mit Ane Hansenip paaserusuppaa.
Aalisarnermut Naalakkersuisoq Finn Karlsen oqarpoq kalaallit avaleraasartoorniarnermik ineriartortitsiniarnerannut akornusersuiniarnissaq siunertarineqassappat Naalakkersuisut akuersaarsinnaanngikkaat, tamannalu tunngavigalugu nunat pineqartut oqaloqatiginiarneqassasut, naak Naalakkersuisut siulittaasuat Aleqa Hammond akuliunniarnatik marsip 21-ani erseqqissaatigereeraluaraa.
-Nunat allat iluminni pisinnaatitaaffitik naapertorlugit isumaqatigiissuteqarnerat upariartuutiginiarsarisinnaanngilarput, taama suleriuseqartoqarneq ajorpoq, soorlu aamma uagut aalisarnerup tungaatigut nunanik allanik isumaqatigiissusiornitsinni savalimmiormiut akuliuffigisinnaanngikkaatigut, Aleqa Hammond oqarpoq.
Aleqa Hammondip akuliunniarnatik marsip 21-ani oqaasii Finn Karlsenillu saaffiginninniarlutik maanna oqaasii imminnut assortuutinnginnersut Finn Karlsenimut apeqqutigaarput, imalu akivoq:
-Naamik isumaqatigiinngissuteqanngilagut, nunat pineqartut isumaqatigiissutigisimasaat allanngortissinnaanngilagut. Kisianni uagutsinnut akornusiiniarluni siunertaqartoqarsimappat taamaattoqartariaqanngimmat oqaloqatigisariaqarpagut.