Avaleraasartuut pillugit isumaqatigiinniarnissat kinguarteqqikkaat

Isumaqatigiinniartut, EU-p saniatigut Nogemit Islandimillu aamma peqataaffigineqartoq, ataasinngornermi februaarip ulluisa 17-ianni naapeqqissapput, avaleraasartuut pillugit isumaqatigiinniarnitik nangeqqittussaassallugit, EU-mi isumaqarpoq savalimmiuormiut aalisakkanik taakkuninnga aalisapiluppallaartoq. Avaleraasartuut ukiut tallimat missaanni assortuussutaareerput.

Savalimmiormiut avaleraasartuunik ammassassuarnillu nunat EU-mut ilaasortat umiarsualiaanut maanna tulaasseqqusaanngillat, savalimmiormiummi allanut naleqqiullugit pingasoriaammik amerlanerusunik ammassassuartarput, sisamariaammillu amerlanerusunik makrelinik pisaqartarlutik, tassa isumaqatigiissutit unioqqutillugit.

Savalimmiormiut nunanut EU-mut ilaasortanut ammassassuarnik avaleraasartuunillu aamma eqqusseqqusaanngillat.

Savalimmiormiulli aalisartut Ruslandimut, Asiamut Afrikamullu taarsiullugu maanna tunisisarput.

EU-lli pillaatissiissutullulligooq taama iliuusaa Savalimmiunit akueriuminaatsinneqaqaaq, nunalllu tamalaat niuteqatigiinnikkut suleqatigiiffiannut, WTO-mut tamanna tunniuteernikuugaluarpaat.

Savalimmiormiut islandimiullu tunngavilersuutigaat, avaleraasartuut ammassassuillu Atlantikup imartaaniittut namminneq imartaminnut qanillinerusimasut, taamaammat namminneq tamakkuninnga sui amerlanerusunik aalisarsinnaatitaasariaqarlutik isumaqarnerarput.

Avaleraasartuunik amerlanernik aalisarsinnaatitaaneq Nunatsinni naluneqanngitsutut aamma anguniarneqarpoq, misileraanertulli suli isigineqarluni, taamaammat EU suli akulerutinngilaq.

EU-p Savalimmiunut taama iliuusaa aggustimi aallartippoq.