Avaleraasartuunut akitsuut isumaqataaffigineqarpoq
Inatsisartuni ilaasortanit juunip sisamaanni pingajussaanneerlugu oqaluuserineqarnissaanut piareerlugu ingerlateqqinneqarpoq.
Avaleraasartuut Tunumi misileraalluni pisarineqartut, kiilumut 95 øre-mik akitsuuserneqassasut, partiit ataatsimiititaliamiittut Siumup, Atassutip aamma Inuit Ataqatigiit isumaqatigiissutigaat.
Akitsuut Naalakkersuisunit 1 koruuni 50 øriususussatut aalajangiunneqarsimasoq taamaalilluni appartingaatsiarneqartussanngorpoq. Tamannali aningaasanut inatsimmut, Naalakkersuisut siunniussaannut 90 millionit koruuninik isertitsissutaanissaanik annaasaqaataassanngitsoq ataatsimiititaliamit erseqqissarneqarpoq, tassa misileraalluni aalisarnermi 100.000 tonsit tamakkerlugit pisarineqarneranni, taakkulu 95 øre-mik akitsuuserneqarpata Nunatta karsianut 95 millionit koruuninik isertitsissutaasussaassammata.
Miseraalluni pisarineqarsinnaasut 100.000 tonsinut amerlineqarnerisa kingorna, taamatullu akitsuutip 1 koruuni 50 øre-unissaanik aalajangiinerup kingorna aalisarnermik ingerlataqartut naammagittaalliornerisa kingorna, akitsuutip angissusissaa pillugu isumaqatigiinnguteqartoqalerppoq. Taakku tunngavilersuutigaat avaleraasartuunik aalisarnissaminnut angallatitik suli atorsinnaannginnamikkit taamaattumik nunat allamiut angallataannik avaleraasartoorniarnermut naleqqussakkanik attartortariaqarnerminni, akitsuutip taama qaffasitsiginerani aalisarneq imminut akilersinnaanavianngimmat.
100.000 tonsit pisarineqartussatut siunniussanit 52.000 tonsit kalaallit aalisartuisa pisassarissavaat allat 38.000 tonsit, Nunatsinni suliffeqarfiit ilaasa nunanit allanit aalisariutinik attartorlutik pisassarissavaat sinnerilu tassa 10.000 tonsit sillimmatitut uninngasuutigineqassallutik.