Avaleraasartoortassat agguaanneqarput

Ingerlatseqatigiiffiit sorliit ukioq manna avaleraasartoorniartitsissanersut ullumi makitsissutigineqarput. Aalisarnermut, Piniarnermut Nunalerinermullu Naalakkersuisoqarfik tusagassiuutinut taama nalunaaruteqarpoq. 

Makitsineq pisariaqalerpoq ingerlatseqatigiiffiit ukioq manna aqqaneq-marluk avaleraasartoorniarniarlutik qinnuteqarsimammata piumasaqaatinut naammassinnittuullutik.

Ingerlatseqatigiiffiit namminneerlutik aalisariuteqanngitsut avaleraasartuut 30.000 tonsit pisassaraat. 

Ingerlatseqatigiiffiit januaarip aallaqqaataani 2016 nallertinnagu pilersinneqareersimasussaapput, aalisarnermillu imaluunniit aalisakkanik tunisassiornermik qangalili ingerlatsisuussallutik, Aalisarnermut, Piniarnermut Nunalerinermullu Naalakkersuisoqarfik taama allappoq.

Ingerlatseqatigiiffiit makinneqartut tassaapput Arsuk Food, Kitaa Seafood, Lilleholm Food, Malik Seafood, Sermilik aamma Rodebay Fish. 

Avaleraasartoortassanik ukioq manna pisarineqarsinnaasut 85.000 tonsiupput.