Avaleraasartoortassat agguaanneqarnerat pillugit ataatsimiititaliamut nassuiaasoqarnissaa kissaatigineqarpoq
Aalisarnermut Ataatsimiititaliap siulittaasua Nikolaj Jeremiassen Siumumeersoq tusagassiuutinut taama nalunaaruteqarpoq.
Pingaartumik suliffeqarfiup KNT-p, Aalisarnermut Naalakkersuisumit Karl-Kristian Krusemit ilaatigut aallartinneqarsimasoq, avaleraasartoortassanik tunineqarnera oqallisigineqarpoq.
Avaleraasartuunik aalisarniarlutik qinnuteqartut suliarineqarnerannut atatillugu Karl-Kristian Krusep sisamanngormat ilisimatitsissutigaa ingerlatseqatigiiffiit ilaannut, qinnuteqarsimasunut, attuumassuteqarpallaarnini pissutigalugu aalajangeeqataasinnaanani. Naalakkersuisut siulittaasuata Kim Kielsenip avaleraasartoortassanik agguaassinissaq politikkikkut taamaammat akisussaaffigigaa aamma nalunaarutigineqarpoq.
Ingerlatseqatigiiffik KNT avaleraasartuunik 4285 tonsinik pisassinneqarpoq. Karl-Kristian Kruselli kingorna nalunaarutigaa suliffeqarfimmit tassannga anereerluni, akisussaaffiilu ernerminut tunniussimallugit.
Taamaattorli Inatsisartut Aalisarnermut, Piniarnermut Nunalerinermullu Ataatsimiititaliaat avaleraasartoortassanik agguaassinermut atatillugu agguaassinermut tunuliaqataasut pillugit nassuiaasoqarnissaa pillugu nukinginnartumik aggersaavoq:
- Ingerlasimaneq Naalakkersuisoqarfimmi imminut misissornissamut tunngavissiisariaqartoq ataatsimiititaliaq isumaqarpoq. Aqutsinermi aalajangiinerup taama annertutigisumik oqallisigineqarnera qaqutigoortorujussuuvoq, Ataatsimiititaliap siulittaasua Nikolaj Jeremiassen ilaatigut taama allaaserisaqarpoq.
Avaleraasartoortassanik agguataarinerup tamanut saqqummiunneqareernerata kingorna ataatsimiititaliaq aalisartunit arlalippassuarnit qinnuteqaamminnik itigartinneqarsimasunit saaffigineqarsimasoq, taassuma aamma oqaluttuaraa.
