Avaleraasartoortassanut isumaqatigiipput
164.000 tonsit taassuma saniatigut pisassiissutigineqarput, taartissatut pisassiissutigineqarlutik. Pisassiissutit taakku avaleraasartuut pisassiissugitineqartut 15 procentit missaraat. Tassa nunat allat avaleraasartoortassanut isumaqatigiissummut ilannguppata taakkunanit pisassinneqarsinnaassapput. Island matumani pingaarnertut inissisimavoq. Islandimiut avaleraasartuunik Savalimmiut peqatigalugit ilaatigut namminneq pisassittarsimapput.
Avaleraasartoortassanik agguaassinerit, avaleraasartoortassat pillugit Londonimi ukioq manna marsip ulluisa aqqaneq-aappaanni isumaqatigiissutigineqartuneersuupput, isumaqatigiissummut nangitsinerullutik. EU-p, Savalimmiut Norgellu akornanni avaleraasartoortassat pillugit aaqqiagiinngissutit qaangerniarlugit Londonimi taamanikkut isumaqatigiissusiortoqarpoq.
Avaleraasartoortassanik aappaagumut agguaassinerit piujuaannartitsinissaq aallaavigalugu pisimasut, Imavinni misissuinerit pillugit nunat tamalaat siunnersuisoqatigiiffiata ICES-ip oqaatigaa, EU-kommissionimiillu tamanna aamma uppernarsarneqarpoq.
Isumaqatigiissutigineqartorli pitsaanerusimasinnaagaluartoq, Danmarkimi anginerusunik aalisariutaatillit peqatigiiffianni, Danmarks Pelagiske Producentorganisationimi, siulittaasup Esben Sverdrup-Jensenip oqaatigaa:
- Atlantikup avannaani avaleraasartuunik ulikkaarpoq, ilisimatuussutsikkullu paasisat aallaavigalugit innersuussusisoqarsimanngitsoq isumaqarpugut, Sverdup-Jensenip, nutaarsiassaqartitsivimmut Ritzauimut oqaatigaa.
Taakkumi isumaqarput Atlantikup avannaani avaleraasartuut amerlassusaasa nalilerneqarnerat kukkusoq, pisassiissutigineqartullu amerlanerusinnaagaluartut.