Avaleraasartoorniat isumalluarpallaanngillat
Taakkua Kalaallit Nunaani suliffissanik nutaanik amerlasuunik pilersitsinissamik isumalluarnermut piviusunngortitsisinnaagunanngillat, avaleraarsartuunummi akitsuut atuutilersinneqaqqammersoq qaffasippallaarpoq aalisariutaatillillu sinneqartoorutissaat annikippallaassallutik, aalisariutaatillit radioaviisimit oqaloqatigisagut taama oqarput.
- Avaleraasartuunik aalisartarnerput sisamaariaammik annertusisariaqassaaq aningaasatigut iluanaarutigissagutsigu - aalisariutaatillit ilaat taama oqarpoq.
Nunatta Islandillu akornanni avaleraasartoorniarnissaq nunatsinni suliffissanik nutaanik million koruuninillu isertitsissutaasussaq isumalluarnarpallaanngitsoq aalisariutaatillit radioaviisimit oqaloqatigineqartut oqaatigaat
Aalisariutaatillit 37it avaleraasartuunik aalisagartassinneqarnissamik qinnuteqarput taakkunanngalu aqqaneq marluk aalisagartassinneqarput.
Aalisariutaatillit avaleraarsartoorniarnissamik aalisagartasinneqarpaat tassaapput Royal Greenland aamma Polar Seafood taakku 20.000 tonsinik aamma 18.000 tonsinik aalisagartassinneqarput.
Aaliusariutaatillit mikinerusut akunnattumillu angissuseqartut avaleraasartoorniarnissamut akuerisaasut tassaapput Niisa Trawl, Robert Møller, Halibut Greenland, Michael Skourup aamma Arctic Prime.
52.000 tonsit aalisariutaatilinnut kalaallinit pigineqartunut aalisagartassiissutigineqarput.
Aalisariutaatillit kilisaataatitik allanngortiterpaat imaluunnit nutaanik kilisaatinik pisinngikkunnik kilisaatinik avaleraasartoorniarsinnaasunik attartorput taakkua nunaqavissunik avataaneersunillu inuttaqartussanik.
Royal Greenland avaleraasartuunik annikitsuinnarik siorna aalisarpoq - naak Namminersorlutik Oqartussat pigisaat avaleraasartassiissutit tallimararterutaannik ukiormanna aalisargartassinneqartoq-
Radioaviiisimit paasiniarneqaraluarpoq avaleraasartoorniarnermi suliffiit nutaat kilisaatillu qassit suliffinnik nutaanik pilersitsinnaassanersut.
Aalisariutaatillip ataatsip naatsorsuutigalluarpaa avaleraasartoorniarnermi umiarsuit sisamat aalisarumartut maannalu kilisaatit marluk pingasulluunniit aalisartinneqassapput avaleraasartuunut akiitsuutip 1, 50 øriunissaata aalajangiunneqarnerata kingorna.
Aalisariutaatilik alla oqaluttuarpoq kilisaat avaleraasartoorniarnissamut atorneqartussaq nutaaq atorneqalissasoq inuttat pigiinnarlugit taannalu raajanik avaleraasartuunillu kilisakkumaartoq-
Maannamut paasisat aallavigalugit sulifissat nutaat pillugit paasissutissat takujuminaapput
KNAPK-imi pisortaq aalisarnermut siunnersuisoqatigiinni aamma siulittaasuusoq Petrus Biilmann radioaviisimut oqaluttuarpoq aalisarnermut naalakkersuisoqarfimmut paasiniarsimagaluarlugu aalisariutaatillit kikkut aamma qanoq amerlatigisunik avaleraasartuunik aalisagartassinneqarsimanersut - mannalu tikillugu aalisarnermut naalakkersuisoqarfik paasissutissanik tunniussaqarsimanngitsoq.
Aalisarnermut Naalakkersuisoqarfiup sapaatip akunnerani tulliuttuni nalunarutiginiarpai - aalisaritaatillit sorliit aamma qanoq amerlatigisunik avaleraasartuunik aalisagatassinneqarsmanersut - aalisariutaatillit aalisarsinnaanermut uppernarsaataat tiguneqariarpata.