Avalammut tapiissutit politikerit amerleqqikkumagaat

Kalaallit Danmarkimi ilinniartut Peqatigiiffiannut tapiissutit affanngorsimanerat, peqatigiiffiup siulittaasuata tupaallaatigalugu uparuaraa, sapaammi oqaluttaraarput. Partiit ukioq mannamut aningaasanut inatsit pillugu isumaqatigiissuteqartuneersut, Siumup aamma IA-p aningaasaliissutinik qaffaaqqinnissaq maanna sulissutigaat.
Assi © : KNR
Allattoq Marie Kûitse Kristensen
marsip 05-at 2019 07:52

Partiimmi taakkua aningaasaliissutinik appaaneq aamma arajutsisimavaat.

Avalammut aningaasaliissutaasartut allanngussanngitsut, aningaasanut inatsisissatut siunersuummut agguaassami allassimagaluarpoq. 
Isumaqatigiinniarnerit naammassimmata, tapiissutit affaannanngussasut inerneruvoq. 

Inuit Ataqatigiit illuatungiliuttuullutik aningaasamut inatsisissamut atsioqataapput, taakkuli sumik atsioqataanertik ilaatigut eqqumaffiginngitsoorsimallugu nassuerutigaat:

- Isumaqatiginninniarnerit ingerlanneqarneranni Avalammut tunngasut immikkut isumaqatiginniniutitut ilaatinneqarsimanngillat , taamaattumillu taannarpiaq pissutaasimanerpa eqqumaffiginngitsoorsimagatsigut Inuit Ataqatigiinninngaaniit tassa taanna ajuusaarutigisorujussuuarput, Inuit Ataqatigiit ilinniartitaanermut oqaaseqartartuat, Sofia Geisler taama oqarpoq.

AAMMA ATUARUK Avalaap sipaarniarfigineqarnera siulittaasup tupigusuutigaa

Danmarkimi ilinniartut Peqatigiiffiat, Avalak, ulluinnarni ingerlatsinerminut atugassaminik ukiut tamaasa tapiiffigineqartarpoq. Tassalu assersuutigalugu ukiut tamaasa pisartumik isumasioqatigiittarnirit, ataatsimeersuarnerit nunatta karsianit tapiissutit iluaqutigalugit pisarpoq.
Tapiissutit siorna 400.000 koruuniupput, ukiormannali 200.000 koruuniullutik. 

Ataatsimiititaliaq akuunngitsoq

Ikililerinissarlu aningaasanut inatsisissamik isumaqatigiinniarnermi killiffiulermat, Inatsisartut Ilinniartitaanermut Ataatsimiititaliaani akuusimanngilaq. Siulittaasoq taama oqarpoq. 

Taamaammat appaasimanerup sumik peqquteqarneranik, Naalakkersuisut apeqquteqarfigissallugit, taassuma neriorsuutigaa, taavalu: 

- Taavalu aamma taamatut appaanermi Avalakkut akuutinneqarsimanersut. Taassumalu kingunerisinnaasaat erseqqissumik paaserusunnarput ataatsimiititaliap tungaaninngaaniit, Kultureqarnermut, Ilinniartitaanermut Ilisimatusarnermut Ilageeqarnermullu Ataatsimiititaliami siulittaasoq Doris J. Jensen taama oqarpoq.

Avalammut aningaasaliissutit qaffaqqinniarneqassasut

Inuit Ataqatigiinniilli aningaasaliissutit qaffaqqinneqarnissaat sulissutiginiarneqarnissaat neriorsuutigineqarpoq.

- Taamaammat tassa piffissami aggersumik immikkut suliassaqarpugut , kingusinnerpaamillu aningaasamut inatsisissaq tulliuttup akuersissutigineqarnissaata tungaanut Avalammut taakku tapiissutaasartut qaffaqqinneqarnissaannut, Sofia Geisler taama oqarpoq.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk