Avalaap sipaarniarfigineqarnera siulittaasup tupigusuutigaa
Naalakkersuisut Avalammut aningaasaliissutinik affaannanngortitsinerat, Avalaap siulittaasuata Hans Peter Mønstedip tupigusuutigaa:
- Ingerlatsinermut aningaasaliissutit affaannanngortinneqarnerannut suna pissutaanersoq paasineq ajuleraluarparput. Aningaasaliissutit allanngortinneqannginnissaat aningaasanut inatsisissami siorna takugatsigu, aningaasaliissutissalli affaannanngortinneqassasut maanna paasivarput, Avalammi siulittaasoq Hans Peter Mønsted, tarnip pissusiinik ilisimatusartoq oqarpoq.
Taassuma ilanngullugu oqaatigaa Avalammut aningaasaliissutit ikilisarneqarnerat pissutaallutik ilinniartut kattuffiup aaqqissuusaanut assigiinngitsunut annernut peqataasarnerminni nammineq akiliisariaqartalissasut.
Akissaatikinnerusut eqqorneqassanerpai
- Aaqqissuussanik anginernik aaqqissuussigaangatta ilinniartut nammineq akiliisalernissaat kingunerissavaa. Siornatigut imaakkami: Ilinniartut aaqqissuussinernut annernut peqataaniartut akiliisariaqartassanngitsut, tassa ilinniartut kikkulluunniit peqataasinnaasut, aningaasat apeqqutaanatik. Massakkut nammineq akiliisalerniarunik akissaqartut taamaallaat ilaasalersinnaassapput, Hans Peter Mønsted oqarpoq.
AAMMA ATUARUK Aarhusimi Avalaap unitsikkallarneqarnissaa pinngitsoortinneqartoq
Avalammut aningaasaliissutit ikilisarneqarnerat Nunatsinni ilinniartitaanerup pitsanngorsarniarneqarneranut naapertuutinngitsoq, Hans Peter Mønstedip oqaatigaa:
- Ilinniarsimasunik nunatsinni atorfissaqartitsilluta taamatut sipaarniarfigineqarnerput naapertuutinngilaq. Eqqumiippoq taamannak sipaarniartoqartoq, naak naalakkersuisut oqaraluartut ilinniartitaaneq pingaaruteqartorujussuusoq, Kalaallit Danmarkimi Ilinniagaqartut Kattuffianni Avalammi siulittaasoq Hans Peter Mønsted, taama oqarpoq.
AAMMA ATUARUK Fortsat kritik fra Avalak
Ilinnniartitaanermut naalakkersuisoq Ane Lone Bagger oqaaseqartinniaraluaratsigu, iluatsissinngilarput.