Avalak nutaamik siulittaasortaassaaq
Michael (Mansi) Rasmussen, maanna kattuffimmi siulittaasuusoq, kattuffik ukiumoortumik Kalaallit Illuanni Aalborgimi ataatsimimeersualerpat siulittaasutut ingerlaqqinnissani kissaatiginngilaa. Erninimi arfineq pingasunik ukiulik, kattuffimmit pingaarnerusutut inissikkamiuk. Taamaattumik Kattuffik ataatsimeersuareernerup kingorna, nutaamik siulittaasortaassaaq.
-Erneqarpunga arfineq pingasunik ukiulimmik, maanna kisimeeqatigisannik, naallu Kattuffimmi suliarisakka pitsaanerusinnaasimagaluartut. Isumaqarpunga siulittaasuunera ukiumik ataatsimik sivisussuseqarsimasoq ajoriinnagassaanngitsumik ingerlassimallugu, Michael ”Mansi” Rasmussen knr.gl-mut taama oqarpoq.
Ukioq manna Kattuffiup ataatsimeersuarnissaanut, soorlu Kattuffiup tusagassiutitigut saqqummiinermini allakkaa, aatsaat taamak peqataatitaqassallutik nalunaarutigaat. Tassalu ataatsimeersuarnermut inuit 80-t sinnerlugit peqattaniarlutik nalunaarsimammata, siornatigullu Kattuffiup ataatsimeersuartitsisarnermini taamaallaat 30-t 40-llu akornanni taamaallaat peqataasoqartarsimagaluartoq.
-Ukioq manna peqataasussat amerlanerinut pissutaasinnaasoraara, tusagassiutit pitsaanerusumik avammut nalunaarutissaqaraangatta, atorluartaratsigit. Taamaattumillu Danmarkimi ilinniartut paasissutissipallattarlutigit, Michael Rasmussen oqarpoq.
Ilaasortat peqataanissaasa saniatigut, peqataasussatut aggertussatut nalunaarsimapput. Folketingemut ilaasortaatitavut marluk, Doris Jakobsen (S) kiisalu Sara Olsvig (IA). Kattuffiullu neriuutigaa Naalakkersuisunut ilaasortat najuukkumaartut. Tassami amerlasuut manna Danmarkimiimmata, Nunat Avannarliit Siunnersuisoqatigiivinut ataatsimiigiarlutik.
