Avaaraq S. Olsenimut suleqataasimasut: Ataatsimoortitsisinnaavoq
Avaaraq S. Olsenip Inuit Ataqatigiinneersup Kommuneqarfik Sermersuumi borgmesterinngortussanngornera illuatungiliuttunit, tassa Siumumut Demokraatinullu ilaasortanit tupaallaatigineqarpoq.
Taakkua taanna politikkikkut ilisarisimarpiannginnerarpaat.
Avaaraq S. Olsen Kommune Kujallermi 2013-mit 2017-mut ilaasortaavoq. Taamani ilaasortaqataasa pitsaasuinnarnik eqqaamasaqarfigaat. Aamma parteeqatiginngikkaluagaasa.
- Kommunalbestyrelse tamarmiusoq Naalakkersuisullu ineqarneq pillugu suliami suleqatigiittariaqartut tassunga erseqqissorujussuarmik tikkuarparput. Tassungalu ammassorujussuummat taanna toqqarparput, Justus Hansen oqarpoq.
AAMMA ATUARUK Kommuneqarfik Sermersuumi borgmesterinngortussaq: Suliassaq annertoqaaq
- Qularinngilara suliassaminik imaannaanngikkaluaqisunik ataatsimoortitsisinnaalluni ingerlasinnaasoq, pissutigalugu oqaloqatiginnillaqqikkami taavalu aamma isummat ilaatigut allaagaluartut oqaloqatigiissutiginissaanut tunuaannarneq ajorami, Lars Lundblad, Siumut sinnerlugu kommunalbestyrelsemut qinigaaffinni tallimani ilaasortaasimasoq, KNR-mut oqarpoq.
Kommuneqarfik Sermersuumi borgmesterertaaq
Avaaraq S. Olsen, 37-nik ukiulik Narsaminngaanneerpoq
Taanna Kommuneqarfik Sermersuumi meeqqanut, ilaqutariinnullu ataatsimiititaliami maannammut siulittaasuugaluarpoq. Kommuni Kujallermilu politikeriunikuuvoq.
Taanna Kommuni Kujallermi 2013-mit 2017-mut borgmesterimut tullersortaasup aappaattut atuuppoq.
Kommunemut siorna qinersisoqarnerani Kommuneqarfik Sermersuumi kommunalbestyrelsemut qinigaavoq.
Taanna borgmesteritut juunip 15-ianit atuutilissaaq.
Taassuma borgmesterissaq inuit atugaasa pitsaanerulernissaat pillugit anguniagaqartartutut eqqaamavaa.
Ilinniartitaanermik aallussisoq
Avaaraq S. Olsen 37-nik ukioqarpoq Narsaminngaanneerlunilu. Taanna meeqqat atuarfianni ilinniartitsisutut ilinniagaqarpoq.
Kommuni Kujallermi borgmesterip Stine Egedep, kommunimi allami borgmesterissaq qinikkatut parteeqatigalugu siornatigut suleqatigaa. Taassuma taanna isummaminik tunuarsimaarnani oqartartuusutut taavaa, ilinniarsimassutsillu qaffassarnissaanut soqutigisaqartuusoq oqarpoq.
- Taamaattumik qularinngilara taassuma tungaatigut massakkut ilisimasaqarnerulernikuulluni pigami, qularutiginngilluinnarpara tamakkununnga sammivilimmik ilungersuuteqarumaarpoq, Stine Egede oqarpoq.
Borgmesterimut tullersortit
Avaaraq S. Olsen Kommune Kujallermi borgmesterimut tullersortaasup aappaattut taamani atuuppoq. Taamani borgmesterimut tullersortaasup siulliup, aamma nuannersuinnarnik eqqaamasaqarfigaa.
- Silappaarissoq aammalu oqallorissorujussuaq. Taavalu politikkimi suliarisartakkatsinnut tunngavilersuillaqqillunilu isumaga malillugu piareersarluarsimalluni sulianut iserniartartoq, Simon Simonsen oqarpoq.
AAMMA ATUARUK IA: Taamaattumik Avaaraq S. Olsen borgmesterertaarerusupparput
Avaaraq S. Olsen Kommuneqarfik Sermersuumi juunip 15-ani borgmesteritut atuutilissaaq.
Suliat arlallit torinngitsut kommunip ineqarnermut susassaqarfiata aqunneqarneranut tunngasut isornartorsiorneqangaatsiareersullu maanna borgmesteriusoq Charlotte Ludvigsen (IA) tunuarniuteqarluni tallimanngormat nalunaaruteqarpoq.