IA: Taamaattumik Avaaraq S. Olsen borgmesterertaarerusupparput
Nutarterneqarpoq 12.53: Juaaka Lyberth IA-p gruppeani siulittaasutut ullumi tunuarluni Facebookimini allappoq. Inge Olsvig Bandt gruppemi siulittaasunngorpoq.
Juaaka Lyberth allappoq: Gruppi formanditut tunuarnissannut peqqutigaara isumaqarama borgmesterertaarnitsinni aamma gruppitsinni nutaamik aaqqissuussilluta nukinnik nutaanik IA-gruppi siuttoqalissasoq. Borgmesteri nutaaq, gruppiformandi nutaaq.
Juaaka Lyberth kommunalbestyrelsemi ilaasortaaginnassaaq.
- Nassuerutigissavara ilimagisimannginnakku Kommuneqarfik Sermersuumi taama sukkatigisumik borgmesteritut inisseriataarnissara, kisianni tassa politikki taamaappoq nalunartoqarneralu nuannequtigivaa.
Kommuneqarfik Sermersuumi borgmesterinngortussaq Avaaraq S. Olsen (IA) ippassaq taama oqarpoq. Soorliuna taanna borgmesterererusunneqartoq?
Borgmesterissamik innersuussinermi kommunalbestyrelsep eqqissisimasumik sulisinnaalernissaa pingaartinneqarsimasoq Kommuneqarfik Sermersuumi IA-p gruppeani siulittaasoq Juaaka Lyberth oqarpoq.
- Kina qinerneqarnerpaasimanersoq apeqqutaatinngilarput. Kommuneqarfik Sermersuumi kommunalbestyrelsep sulinerani anersaaq nutaaq eqqunneqassasoq pingaartipparput. Taammattumik Avaaraq sassartipparput, Juaaka Lyberth oqarpoq.
- Pisut tamaasa aallaavigalugit nalilersuivugut, allattarfissuaq maanna salissavarput nutaaamillu aallartilluta. Siunissami silatusaartumik pilersaarusiornissaq eqqarsaatigaarput. Isumaqatigiissutaareersunut attuumassuteqanngitsumik borgmesterertaarusuppugut. Kommunalbestyrelsep tamarmiusup suleqatigiilluarsinnaanissanut ajoqutaasinnaasunik kaasarfimmioqanngitsumik sassartitserusuppugut, Juaaka Lyberth oqarpoq.
- Taamaattumillu Kommuneqarfik Sermersuumi politikeri inuusuttoq pikkorissorlu borgmesterissatut toqqarparput, Juaaka Lyberth oqarpoq.
Suliat torinngitsut pillugit borgmesteri tunuartoq
Narsarmiu Avaaraq Olsen Nuummut 2007-mi nuuppoq, ilinniartitsutullu ilinniagaqarluni. 37-nik ukioqarpoq Kommuneqarfik Sermersuumilu atuarfeqarfinnut siunnersortitut maanna sulilluni.
Taanna siorna kommunemut qinersinermi 241-nit taaguunneqarluni Kommuneqarfik Sermersuumi kommunalbestyrelsemut ilaasortanngorpoq.
Avaaraq S. Olsenip politikeritut sulinera 2013-mi aallartippoq, Kommune Kujallermilu 2017-ip tungaanut qinikkatut sulinermini borgmesterip tullersortaata aappaattut ilaatigut sulilluni. Kommuneqarfik Sermersuumilu juunip 15-ianiit borgmesterinngortussanngorpoq.
Suliat arlallit torinngitsut kommunip ineqarnermut susassaqarfiata aqunneqarneranut tunngasut isornartorsiorneqangaatsiareersullu maanna borgmesteriusoq Charlotte Ludvigsen (IA) tunuarniuteqarluni tallimanngormat nalunaaruteqarpoq.