Australiamiut aatsitassarsiornissamik qinnuteqarniarput
Saviminissanillu qaqutigoortunik Nunatsinni piiaanissaq siulleq 2016-imi aallatisasoq ilimanarpoq. Piiaagaq uranitaqassanngitsoq nunatsinniillu sulisoqarluni piiaasoqassasoq, ingeniøren.dk allappoq.
Piginneqatigiiffiup qinnuteqaataa siuleq tuluttuinnaq allagaammat, Aatsitassanut Pisortaqarfiup marsimi 2012-imi itigartippaa.
Mannali ajornavianngilaq. Kommune Kujalleq nittartakkamini oqaluttuarpoq, qinnuteqaat oqaatsinut pisariaqartunut nutserneqarsimalersoq.
Aatsitassarsiorfik annertussanngitsoq ammaannartuussasorlu, ingeniøren.dk allappoq.
Tanbreez Mining Greenland ukiuni qulini ukiumut ujaqqanik 500.000 tonsinik qaartiterinissamik aallaqqaammut qinnuteqarpoq, ujaraaqat feldspatitallit 200.000 tonsit ujaraaqqqallu eudialyt-itallit 100.000 tonsit allaruttasallugit.
Kisianni piiarsinnaasaq angineroqaaq, saffiugassat eudialyt aamma feldspat piaaffiup eqqaani sumi taqmaani nassaassaammata.
Qinnuteqartut Aatsitassanut Pisortaqarfimmit Naalakkeersuisunillu akuerineqarnissamut qulartariaqanngillat, uppernarsaasiornissatit, qinnuteqaammut ilaasussat, pisortat suleqatigalugit ilusilersorneqarsimammata.
- Qinnuteqaasiornitta assersuutigalugu tunisassiornermut innallagissamillu pilersorneqarnissatsinnut tunngasortaani aammalu inuiaqatigiinnut sunniutaasinnaasunut tunngasortaat suliarineranni Pisortaqarfik akuuinnavipput, MT Højgaard-imeersoq Nikolaj Brandt, qinnuteqaasiornermi suleqataasimasoq, nassuiaavoq.
Aatsitassat pillugit inatsit naapertorlugu, aatsitassat nunatsinni piiarneqartut nunatsinni suliaqqinneqarsinaanersut sukumuiisumik misissorneqartusaavoq. Kisianni eudialyttimik suliareqqiiniaraanni akuutissanik Nunatsinnut eqqussuinissaq ima pisariaqartigaaq, taamaalioraluaraanni suliniut imminut akilersinaassanani.
Taamaammat eudialyttip Europami suliareqqinneqartarnissaa Tanbreezip siunniuppaa
Killavaat Alannguanni piiaagassaq uranimik akoqanngilaq, tamannalu GME-p Kuannersuarni piiarniagaanit allaanerussuaavoq, ingeniøren.dk allappoq.
Tassalu Naalakkersuisut aatsitassanik piiaanmissamik akuersissuteqarsinaapput, uranimik piiaanissamut naagaarluinnarneq kalluanngikkaluarlugu.
Piaavimmi sulisut 90 procentii tikillugit nunatsinneersuunissaat naatsorsuutigineqarpoq.
Tanbreezip qinnuteqaataaNaminersorlutik Oqartussat ulloq taanna tiguppassuk tusarniaaaq aallartissaaq. Tusarniaanermut atatillugu Kujataani Nuummilu innutatasunut paasisitsiniaalluni ataatsimiisitsinerit februaari 14-ani aallartisapput. Narsarmiut siulliussapput, Tanbreezimi sulisunut ulloq taanna apeqqarissaarnissamut periarfissaqassagamik.