KNR Atuisut tusaaniarlugit KNR atortunik nutarterivoq

Tusagassiorfinni atortorissaarutit nutartertuarput, tamatumalu ilutigisaanik atuisut atueriaasaat allanngoriartorpoq; imarisat saqqummiunneqartarnerisalu pitsaanerujuarnissaat piumasaqaatit ilagivaat.

Taamaammat KNR-ip periusissiami nutaami siunniuppaa atuisut ulluinnarni tusagassiutinik atuiffiini naaperiassallugit, tamannalu teknikkikkut atortorissaarutinik nutaanik pisinikkut qulakkeerniarneqarpoq.

Atuisut tusaaniarnissaat pingaartipparput, taamaammat imarisatigut teknikkikkullu pitsaassutsimik piumasaqarneri tusaaniarlugit nutarterissaagut, KNR-p pisortaa Karl-Henrik Simonsen oqarpoq.

KNR-ip isiginnaartartumi tusarnaartartumilu isumaannik misissuinerata ersersippaa nunatsinni tv radiolu tusagassiutitut suli atorneqarnerpaajusut, taamaakkaluartorli nittartakkatigut nutaarsiassaqartitsiviit inuillu attaveqaqatigiiffii atugaaleraluttuinnartut aamma erserpoq. Taamaattoqarneralu KNR-imut pisussaaffiliivoq.

Pisussaaffik taanna naammassiniarlugu KNR-imi aqutsisut aalajangerput Boffins Technologies suleqatigalugu atortunik nutarteriniarlutik. Taamaaliornerlu KNR-ip pisarnermiit pisariinnerusumik radiokkut tv-kkullu tusagassiuiuarsinnaaneranik  kinguneqassaaq, aammali nittartakkatigut nutaarsiassaqartitsinerup inuillu attaveqaqatigiiffiinik atuinerup nukittorsarneqarneranik kinguneqassalluni.

Atortut pisoqalisut KNR-imi ukiorpassuarni atorneqarput, tamannalu amerlasuutigut atuisunut tuttarpoq. Nutarterinitsigut imarisagut aallulluarsinnaanerulissavagut atortugut pisoqalisut nukippassuarnik atuiffigiunnaarlugit, KNR-ip pisortaa Karl-Henrik Simonsen oqarpoq.

Boffins Technologies atortunik pisariitsunik KNR-ip angissusaanut kissaatigisaanullu tulluarsakkanik neqerooruteqarnermikkut toqqarneqarput.

Annertunerusumik paasisaqarusullutit apeqqutissaqaruit KNR-ip pisortaanut Karl-Henrik Simonsenimut sianersinnaavutit, uunga: +299 36 15 00 una aqqusaarlugu knr.gl/attavissaq allassinnaavutit