Atuisoq: Timmisartumut billetsisileruit kreditkort atoruk
Air Greenlandip aamma Greenland Expressip timmisartut kinguaattooraangata billetsit annaaneqartut taarsertarpai. Nunatsinnili piumasaqaataanngilaq timmisartuutileqatigiiffiit akiliisinnaajunnaaratarsinnaanissaannut sillimmasernissaq.
Taamaattumik aningaaserivinni kreditkortisinissaq atuisut siunnersuisoqatigiiffiata Atuisup innersuussutigaa.
- Nunani tamalaani kreditkort atorneqarsinnaasoq, soorlu Mastercard imaluunnit American Express billetsisinermi atorneqarnissaat innersuussuussutigisinnaavarput, Cecilie Juhl Nielsen Atuisumi inatsisileritooq oqarpoq.
Taanna nassuiaavoq timmisartuutileqatigiiffik akiliisinnaajunnaassagaluarpat kreditkortimik piginnittut aningaaserivimminnut saaffiginnikkaangata aningaaseriviit aningaasanik utertitsiniarlutik qinnuteqarsinnaasartut.
Timmisartumut billetsisigaangavit aningaasaativit annaanissaat annilaangagisarpiuk? Taamaappat kreditkortitaarnissat pitsaanerussasoq Atuisoq isumaqarpoq.
Atuisut amerlanersaat aningaasanik tigusinissamut kortinik nalinginnaasumik kiisalu Visa Dankortinut assingusunik peqartarput, taakkuli timmisartuutileqatigiiffiit akiliisinnaajunnaassagaluarpata aningaasanik utertitsisinnaanavianngillat.
Mastercard Guld sillimmatitaqarpoq
Assersuutigalugu kreditkorti Mastercard Guld angalanermut sillimmatitalik Grønlandsbankenip neqeroorutigisarpaa, taanna ukiumut 550 koruuneqarpoq. Bank Nordik taama ittunik aamma neqerooruteqartarpoq, taakkunanili ukiumut 850 koruuneqartarpoq.
Aningaaserivippit Mastercard Gulditaarnissat akuerissappagu aningaasartuutivit ilaat utertissinnaassavatit, timmisartuutileqatigiiffillu akiliisinnaajunnaassagaluarpat kreditkorteqarallartillutit aningaasaatitit utertissinnaavatit.
Nunatsinnili piumasaqaataanngilaq timmisartuutileqatigiiffiit akiliisinnaajunnaaratarsinnaanissaannut sillimmasernissaq, naak assersuutigalugu Danmarkimi inatsisitigut tamanna illersugaagaluartoq.
- Timmisartuutileqatigiiffik akiliisinnaajunnaassagaluarpat kreditkorteqanngikkaanni taarsiivigitissinnaaneq ilimanarpallaanngilaq, Cecilie Juhl Nielsen nassuiaavoq.
Innuttaasut nalornissuteqartut saaffiginninnissaminnut tikilluaqqusaasut Atuisoq ilisimatitsivoq, nittartagaat Atuisoq.gl aamma alakkarneqarsinnaavoq.
Danmarkimi mittarfimmit aallassaguit Danmarkimiinnernilu billetsimik pisiguit aatsaat Air Greenlandikkut ilassutitut sillimmasiinermik pisisinnaavutit.
