Atuisoq: Pisiassat akii assigiinngissuteqarpianngillat
Pisisartulli isumaqarsinnaapput akit assigiinngissuseqarnerat eqqorpallaanngitsoq, Atuisormi nioqqutissanik aaliangersimasuni kisimi niuertarfinni aki nalinginnaasoq atorneqartarnersoq paasiniarlugu misissuisimammat.
Atuisut siunnersuisooqatigiit sinnerlugit Atuisoq nunatsinni illoqarfinni nunaqarfinnilu assigiinngitsuni ulluinnarni pisiarineqarnerusartut immikoortut sisamat misissoqqammerpaat.
Tassa angerlarsimaffimmi ulluinnarni atortut, soorlu equutissiat qaqorsaatillu. Suaasat pastallu. Qajuusat akuutissallu, kiisalu qerisut.
Misissuinerillu takutippaat pisiassani misissorneqartuni 204-suni akit nikerarnerat agguaqatigiisillugu 14 procentiusoq.
Tassa imaappoq pisiniarfimmi nioqqutissamik arlaannik pisiguit 20 koruuneqarpat, taava pisiniarfimmi allami 17 koruuneqarsinnaavoq imaluunniit 23 koruuneqarluni.
-Misissuinitta inernerivaat nunaqarfinni illoqarfinnilu pisiassat pisiarineqarnerusartut akii nikingassuteqarujussuanngitsut. Isumaqarpugut ajunngitsuusoq illoqarfinniikkaluaraanniluunniit nunaqarfinniikkaluaraanniluunniit pisiassat akii nikingassuteqarujussuanngitsut, Atuisumi Atuisut siunnersuisooqatigiinni immikkoortortami pisortaq Jannik Isidor oqarpoq.
Akinik misissuinermi manniit ilaatinneqanngillat. Radioaaviisimiit Pilersuisup pisiniarfiisa ilaannut manniutaat qanoq akeqarnersut paasiniaavugut.
Savissivimmi manniuteqanngillat. Tasiilami maniit poortat ataatsit arfinilinnik imalik 26,50 koruuneqarput. Nuummili maniit poortat ataatsit arfinilinnik imalik 18,50 koruuninik akeqarput. Tasiilamut sanilliutissagaanni 8 koruuninik akikinnerupput.
Tunumulli avannarparterutta Illoqqortoomiuni manniit arfinillit 39 koruunerput.
Manniit akii nikingassuteqarujussuarnerat pillugu akinik misissuineq naleqqunnersoq Atuisoq aperaarput.
-Apeqqut piviusuuvoq, akissalluguli ajornarpoq. Imaassinnaagami pisiassat aaliangersimasut piffissami tassani akikillillugu neqeroorutaasinnaasoq, soorlu pisiniarfinni tamanna atugaasorujussuusoq, Atuisumi Atuisut siunnersuisooqatigiivini immikkoortortami pisortaq Jannik Isidor taama oqarpoq.